Ils uffants da la scola primara e la scolina da Schmitten pon ir definitivamain a Tavau a scola davent da l'onn da scola 2023/24. Ina cunvegna tranter las vischnancas saja vegnida suttascritta, communitgeschan las duas vischnancas.
Ils scolars dal stgalim superiur vegnian vinavant ad ir a scola a Casti. Il contract cun il consorzi da scola Val d’Alvra scadia pir la fin da l’onn da scola 2023/24.
Per sclerir dumondas eventualas organiseschia las vischnanca duas sairas d’infurmaziun ils 23 da matg. Ina las 18:00 en la chasa da scola Wiesen e la segunda las 19:30 en la sala polivalenta a Schmitten.
Irritaziuns pervi da decisun da Schmitten
Schmitten aveva decidì il 2018 da betg pli trametter ils scolars e las scolaras a la scola en val d'Alvra, ma a partir da l'onn da scola 2023/2024 a Tavau. Questa decisiun aveva chaschunà grondas irritaziuns tranter pliras vischnancas ed il chantun.
Tenor la suprastanza communala da Schmitten na stettia questa dumonda betg en connex cun il tema fusiun da vischnanca – mabain manifesteschia sulettamain la buna collavuraziun tranter vischins.
Nagin stgalim da basa da Tavau
La suprastanza da Tavau avess gugent introducì in uschenumnà stgalim da basa per la scola a Tavau-Tagn/Wiesen. Quai vuless dir, ch'ils dus onns da la scolina, vegnissan colliads cun ils emprims dus onns da la scola primara. Uffants tranter quatter ed otg onns vegnissan uschia instruids communablamain.
Il chantun è dentant stà cunter quest model ed ha declerà ch'in tal model na saja legalmain betg pussaivel en il Grischun. Sco che la regenza da Tavau scriva ussa, sajan lur mauns liads tras quai ed il model na possia betg vegnir introducì.
