En ina stanza separada s'ha Aita Biert drizzà en per la terapia da musica. L'object principal è il monocord – in instrument da lain nua ch'i ha survart ina sort maisa nua ch'il pazient u pazienta po giaschair. Ed ina part sutvart cun cordas che sunan tuttas il medem tun. Tras ils suns da las cordas datti vibraziuns che gidan da relaxar il corp e l’olma.
La terapia da musica sa basa sin scienza e studis che han retschertgà l'effect positiv da la musica sin las cellas dal corp u era l'influenza sin la psica. Perquai ha Aita Biert era fatg in studi da master per pudair porscher talas terapias che vegnan era pajadas da las cassas da malsauns. Quellas terapias porscha ella dapi bunamain 20 onns.
Terapia da musica n'è betg «hocuspocus».
Per la terapia da musica ins stoppia esser avert. Per che la clientella s'avra, sto la terapeuta crear in'atmosfera agreabla e gudagnar la fiduzia. Aita Biert ha l'obligaziun da discreziun. Quai vul dir che tut quai ch'in client u clienta raquinta ad ella, resta en la stanza da terapia. Notizias u registraziuns na vegnan era betg fatgas.
Cordas dal monocord
-
Bild 1 von 2. Sunar il monocord. Bildquelle: Aita Biert.
-
Bild 2 von 2. Cordas dal monocord. Bildquelle: Aita Biert.
La terapia cumenza cun in curt discurs nua che vegn declerà sco che l'instrument funcziuna ed il client e clienta raquinta in zic da sasez. Ha el u ella in problem? Fa’l patratgs? U vul el simplamain empruvar il monocord? La clientella d'Aita Biert è fitg diversa.
Mes clients e clientas èn da tut las vegliadetgnas, professiuns u intellects. Mintgin ha in auter desideri. Ils ins han ina dumonda interna, ils auters in problem corporal e lura datti era da quels che han simplamain bunder.
Suenter il discurs sa metta la persuna sin il monocord ed Aita Biert cumenza cun simplas instrucziuns da respirar. Cura che la clienta è lura sa calmada, èsi temp per la musica.
La terapeuta lascha sunar las cordas dal monocord – e tras ils tuns e las vibraziuns sa relaxeschan corp e spiert. Tut tenor basegn basta ina tschentada da terapia simplamain sco experientscha, auters vulan e dovran la terapia regularmain. Quai saja tut tenor client e problem fitg divers.