La naiv bramada ha procurà l’ultima minuta per in sentiment d’enviern als territoris da skis da Mustér e Savognin. Suenter ina stagiun cun pauca naiv natirala, ina purschida reducida ed ina clera perdita da la svieuta marschan ussa tut las sutgeras e runals – e las pistas sa preschentan finalmain en in bun stadi. Malgrà che la naiv che è rivada cun retard na po betg stuppar las rusnas finanzialas, porta ella almain ina fin da la stagiun plain motivaziun.
En tuttas duas destinaziuns fan las pendicularas quint cun in minus cumpareglià cun l’onn passà – a Mustér cun var 1 milliun francs damain svieuta per il december ed il schaner. La naiv nova ha tuttina l’effect d’in booster d’atmosfera: Ils giasts èn cuntents ed il persunal motivà.
Cun quellas temperaturas chaudas che nus vain ussa vessan nus betg pudì tegnair avert il territori.
La naiv gida era als restaurants. Si Radons, sur Savognin, veva la mancanza da naiv mussà consequenzas drasticas: Senza indrizs d’ennavar n’eran las ustarias per part betg cuntanschiblas. Uss èn las terrassas puspè plainas – e la speranza per ina buna finiziun resta.