Naiv hai quest enviern forsa betg dà durant uschè blers dis sco auters onns – tuttina tanschi en bleras regiuns per anc tegnair avert in mument ils territoris da skis.
Nossa carta mussa en in'egliada nua e fin cura ch'ins po ir sin pista.
Entant che territoris pli pitschens sco Sarn Mantogna serran gia ils 8 da mars, tegnan auters la dira fin mez u la fin da mars.
Pli brin che alv
Ils blers territoris fan quint da terminar la stagiun l'avrigl: Savognin, Sedrun Andermatt u Spleia han communitgà da vulair tegnair en funcziun ils lifts enfin ils 6 d'avrigl e Laax, Arosa Lai e Scuol Zernez perfin enfin ils 12 d'avrigl.
En la regiun Engiadina San Murezzan serran ils territoris successivamain – cun Diavolezza ils 3 da matg sco davos. Ed era Samignun / Ischgl spetga da transportar snowboardistas e skiunzs fin ils 3 da matg.
Blera naiv il favrer, enviern resta dentant miaivel
Tenor Meteo Svizra èn ils mais december e schaner en las regiuns muntagnardas stads «per grondas part pli miaivels che la media da plirs onns», quai che ha gì per consequenza che la cuverta da naiv è stada pli satiglia che en media. Pir il favrer 2026 hai dà grondas quantitads da naiv nova en la Svizra franzosa, en il Vallais ed a la spunda nord da las Alps – suenter dus mais cun fitg pauca naiv.