Territoris da skis - «Nus prendain mintga scrotta»

Tranter ils sis manaschis da la branscha turistica grischuna che han tenor l’agentura da novitads Keystone-SDA tschentà la dumonda al chantun Grischun per indemnisaziun da lavur curta sa chattan era las pendicularas da Mustér. Quai ha il mainafatschenta Stefan Arnold ditg envers la FMR. Las pendicularas da Mustér pateschan sco la pli part da las pendicularas sursilvanas da la mancanza actuala da naiv.

Ustarias serradas

Cun ina tala digren da la svieuta adempleschan las pendicularas da Mustér pli probabel ils criteris per retrair daners per lavur curta. Access a la lavur curta han manaschis turistics che pateschan da mancanza da naiv e che nodan ina digren da la svieuta da 25% cumpareglià cun la media da tschintg onns cuntanschida durant il medem spazi da temp. Vegnan las dumondas per lavur curta concedidas, vegnan las interpresas indemnisadas cun 80% da las uras da lavur mancantas. Quai tenor las infurmaziuns accessiblas via la pagina dal Uffizi chantunal per industria, mastergn e lavur.

Stefan Arnold di che divers indrizs en il territori da skis da Mustér na sajan betg stads en funcziun dapi l'entschatta da la stagiun pervia da la mancanza da naiv. Consequentamain n'èsi era betg stà pussaivel d'avrir l'ustaria da culm Lai Alv. «Il persunal da l'ustaria sco il persunal da las pendicularas n'han betg gì lavur.» Stefan Arnold di ch'i saja reussì en il decurs dals diesch dis vargads, grazia a bler badelar e stuschar naiv d'avrir diversas pistas. Las pendicularas hajan uschia avert l'access nov da Sedrun e mess en funcziun la sutgera fin Lai Alv, uschia che l'ustaria ha pudì avrir las portas. Pli gugent che dumondas per indemnisaziun da lavur curta avess Stefan Arnold sa chapescha naiv.

Investì cuntinuadamain

Bler meglra è la situaziun tar las pendicularas d'Andermatt/Sedrun che n'han betg survegnì dapli naiv giu dal tschiel, mabain dapli naiv dals chanuns. Quai conceda il president da l'organisaziun turistica da Sedrun/Mustér, Silvio Schmid ch'è era engaschà tar las pendicularas da l'arena da skis Andermatt/Sedrun sco mainaproject. El fa attent che las pendicularas d'Andermatt/Sedrun hajan consequentamain investì dapi l'onn 2000 en indrizs d'ennavar. Ils Americans e las Americanas che han surprendì las pendicularas hajan cuntinuà cun quella strategia, uschia che 90% da las pistas sajan avertas.

Silvio Schmid è era en il cussegl d'administraziun da las pendicularas d'Airolo. En il sid da las alps n'è la situaziun betg main precara. Ad Airolo mancan l'aua ed ils chanuns da naiv, tenor Silvio Schmid. El è persvadì che las experientschas actualas sforzian la branscha d'investir dapli en la naiv artifiziala en il cas ch'ils daners stattan a disposiziun.

Inoltrà ad uras

Il pledader da l'Uffizi per industria, mastergn e lavur Gian Reto Caduff ha discurrì envers l'agentura da novitads Keystone-SDA da 100 emploiadas ed emploiads ch'en pertutgads da la lavur curta e quai principalmain en manaschis gastronomics da pendicularas. Las interpresas pertutgadas hajan inoltrà las dumondas ad uras sin il termin fixà ils 5 da schner 2026. La davosa giada haja il Chantun nudà 13 preannunzias per lavur curta da la branscha da pendicularas il december 2022 e l'entschatta 2023.

Situaziun en ulteriuras regiuns da skis

Era auters territoris da skis en Surselva n'han pervia da la pauca naiv betg avert tut las pistas e perquai èn era diversas ustarias sin il culm serradas. Quai pertutga l'ustaria Dachberg dal territori da skis da Val S. Pieder. Serradas en il territori da skis da Sursaissa/Mundaun èn las ustarias Péz Mundaun, Péz Sezner e Valli. En il territori da skis da Breil èn tut las ustarias avertas, quella da l'Alp Dado sura era tranter Nadal e Daniev dentant mo grev da cuntanscher.

Dals 50 manaschis da gastronomia inditgads sin la pagina da las pendicularas da l'Arena Alva èn 19 serrads. Intgins da quels na sa chattan dentant betg en il territori da skis e n'èn perquai era betg serrads pervia da la mancanza da naiv.

Quai dat da discutar