Glieud che porscha sezza turas, glieud che s'engascha per la natira e glieud da l'economia è s'inscuntrada a l'emprim workshop dal project «Graubünden Skitouren». Suenter avair fatg prestudis e preworkshops duai il project uss vegnir lantschà per propi, di il manader dal project Nico Dalcolmo.
L'idea è d'identifitgar problems e tschertgar schliaziuns. Igl è ina schanza per tuts e tuttas che lavuran en quella branscha.
I sa tracta d'in project da la nova politica regiunala (NPR) sco ch'i dat gia auters projects sumegliants. L'organisaziun «Zenit run» maina il project che vegn sustegnì dal chantun e da la Confederaziun.
Sfidas e schanzas
La mancanza da naiv, la protecziun da la natira, glieud che sutstima il privel da lavinas e glieud da turas che sa tschenta sin pistas da skis vegnan numnadas sco sfidas. Era conflicts cun la populaziun locala ed ina mancanza da plazzas da parcar èn in tema.
I duai dar valurisaziun per las regiuns, ma betg sin cust da la natira.
La prevenziun d'accidents e sensibilisaziun per respectar la natira duai vegnir rinforzada. Actualmain po glieud che va sin ina turas da skis vegnir chastiada, sch'ella na respecta betg las zonas da protecziun da selvaschina. Ordaifer da quellas na datti però naginas regulaziuns legalas. In'idea che vegn era numnada durant las discussiun è in chanal da communicaziun central – ina pagina d'internet che porscha infurmaziuns davart tut quai ch'ins dovra en in lieu – per exempel davart l'aura, las rutas e la segirtad.
Ideas, co generar valurisaziun en las regiuns da turas da skis, vegnan era rimnadas. Tenor Nico Dalcolmo duain differentas regiuns pudair profitar da projects da pilot che vegnan creadas en autras regiuns.
Skis electrics e gieus olimpics
Turas da skis vegnan en mintga cas a sa midar en il futur. Meinrad Arpagaus, schef da turas dal CAS Piz Terri, è in zic sceptic pertutgant ils skis da turas cun sustegn electric ch'èn in pendant als velos electrics.
Da nov vegn il sport era ad esser per l'emprima giada part dals gieus olimpics a Cortina e Milaun, quai che vegn ad esser ina nova furma pli cumpetitiva.
Tge svilup futur fiss in success?
La fin dal workshop vegnan ils participants e las participantas dumandadas, tge svilup futur che fiss per els ed ellas in success. «Collavuraziun», «crear valurisaziun per las regiuns», «animar giuvens e giuvnas per il sport da prestaziun». Las respostas èn diversas e mussan ch'i dat differentas prioritads. En general è l'atmosfera positiva, di Flavia Gsell dal departament da marketing da Grischun Vacanzas.
Chattar ina buna balantscha tranter proteger e nizzegiar è il facit final. «Graubünden Skitouren» vegn a cuntinuar cun ulteriurs workshops, lieus d'inscunter e realisar plirs projects en connex cun turas da skis.