«Ozendi pon ins contribuir bler cun bajegiar las pistas uschia ch'i dat damain accidents», di Corsin Clopath (42), il manader dal sectur pistas salvament da las pendicularas Arena Alva SA. «Nus investin bler en la segirtad da nossa clientella sin pista e vegnin perquai da minimar quels accidents ch’ins pudess attribuir a la qualitad da las pistas.» Onns sco quest onn cun pauca naiv na saja betg simpel da stuppar mintga rusna, di il manader.
La segirtad munta tut
Las pistas hajan da far bler cun la segirtad e cun il salvament en il territori da skis sur Laax, Flem e Falera. A la fin dals quints portia el sco schef la responsabladad. «Ins emprenda fitg bler cun l’experientscha da plirs onns e cun scolaziuns regularas. Cura ch’i sa tracta per exempel d’avrir singulas pistas poss jau giuditgar oz fitg spert sch’ina pista è segira u betg.» Las decisiuns areguard l’avertura da las pistas dal territori da skis Arena Alva vegnian dentant adina discutadas e dadas d'in gremi, di Corsin Clopath ch’è creschì si a Trin e ch'ha emprendì selvicultur sco emprim mastergn.
La motivaziun da Corsin Clopath da lavurar sco manader da salvament e da pistas tar las pendicularas Arena Alva SA è principalmain la lavur dadora en la natira. «Igl è in bellezza sentiment d’esser siador en ils culms d'uras ch’ins n'entaupa nagin là. Igl ha dà temps che la lavur en noss team è stada difficila. Jau sun perfin stà sin il precint da bandunar l’Arena Alva ina giada. Mo il davos sun jau restà, grazia a mes superiur Reto Gurtner e grazia a mia affecziun per la natira e las muntognas.»
Però era ina vart sumbrivauna
Sper tut ils blers muments legraivels hai era dà situaziuns tragicas en la lavur fin ussa di il schef da salvament e da pistas da l’Arena Alva. «Igl ha dà intgins accidents mortals sin nossas pistas. Quai èn adina situaziuns extraordinarias.» Specialmain bain sa regordia el vi da l'emprim grev accident mortal, raquinta Corsin Clopath. «Jau ma regord ch’jau hai guardà conscientamain en fatscha a quella persuna morta. Quai maletg è propi ì a funs a mi ed è restà ditg.»
El haja savì da bell’entschatta ch’el stoppia chattar ina strategia per vegnir a frida cun grevs accidents e mortoris sin pista. Oz saja quai daventà pli fitg rutina. «Oz è quai daventà per mai pli normal d’ir enturn cun in accident mortal ed jau patratg lura adina che la mort tutga era tar la vita dal carstgaun.» Il pli impurtant saja da savair, ch’ins haja fatg il pussaivel en favur da la persuna disgraziada.
Muments ch’ins funcziuna
Sper ils accidents d'osps haja era dà avant paucs onns in accident mortal d’in collavuratur da l’Arena Alva, raquinta Corsin Clopath. «Jau hai fatg atras auters accidents da collavuraturs e collegas. Ma en quai cas dal december 2022 hai jau registrà detg spert ch’ins na pudeva betg gidar pli il collega ch’è sa disgrazià sin il mast da la pendiculara da Crap Sogn Gion.»
I saja grev da declarar ils agens sentiments, ma en tals muments funcziunia ins simplamain. Ils maletgs e la reflexiun schebain ins haja fatg tut endretg sajan – en il cas da l'emprendist sa disgrazià – turnà la saira suenter l'accident cura ch’el era a chasa. «Igl è tragic, ma en tschertas situaziuns d’accidents datti cunfins ed ins na po far nagut pli per la persuna disgraziada. En lezza situaziun èsi impurtant da tgirar ils cunparticipads sin il plaz d’accident.»
Ina gronda famiglia
Corsin Clopath è era manader da chauns da lavinas ed el vegn savens accumpagnà da ses chaun Yard. El raquinta ch’el lavuria dapi l'onn 2002 tar las pendicularas Arena Alva. Cun la responsabladad per pistas salvament saja el stedi sin il culm, tgiria blers contacts e discurs era cun collavuraturas e collavuraturs. «Jau hai l’impressiun che nus sajan sco ina gronda famiglia che viva la filosofia e lavura tenor las ideas innovativas che Reto Gurtner realisescha ensemen cun nus.» Els sa sa sprovian da dar il maximum, er en favur da las vischnancas da Flem Laax e Falera ch'èn ussa las possessuras da las pendicularas. «Cun quellas vischnancas cultivain dapi blers onns buns contacts. Ellas eran gia pli baud las possessuras dals indrezs da far naiv.»
Sajettar lavinas
Ina da las lavurs preferidas da Corsin Clopath saja quella da sajettar lavinas or dal helicopter. «I na funcziuna betg adina sin cumond», di el. La natira dettia cunfins ed è na saja betg pussaivel da sfurzar insatge.«Da quels muments ch’ins na vegn buc da sajettar ina lavina ves’ins propi ils cunfins da las pussaivladads ch’il carstgaun ha. I va mo sch’ins lavura cun la natira. E che la veglia da la natira è pli ferma che quella dal carstgaun.» Quai saja insatge ch'impressiuneschia el adina puspè, cumplettescha Corsin Clopath ch’è dapi l'atun 2024 commember da la direcziun da la Arena Alva SA.
La natira cumonda
«Tschà e là ha blera glieud braja da chapir, pertge ch’ins na po betg laschar ir ina pendiculara pervi dal vent memia ferm, u perquai che nus essan vidlonder da far lavurs da segirtad», di Corsin Clopath. Il medem valia era per pistas ch’ins na po betg avrir. «En ils territoris da skis èsi simplamain de facto che la natira cumonda las festas e betg il carstgaun. Il carstgaun po far il pussaivel. Mo sch’ins vesa ch’igl è privlus, lura ha il carstgaun d’acceptar e da sa cumportar lasuenter.» Sch’el dastgassia exprimer in giavisch en sia funcziun sco manader dal servetsch da salvament e da pistas, lura giavischassia el che la glieud haja dapli chapientscha per ils cunfins che la natira dettia als territoris da sport d’enviern.