La regiun Partenz/Tavau vuless far pli ferm ses turissem. E la populaziun duess pudair star davos quel. Perquai hajan ins integrà las abitantas ed abitants tar l'elavuraziun dal turissem da l'avegnir, di Nadja Fleischli, la responsabla per il svilup regiunal Partenz/Tavau.
I dettia studis che cumprovan che la perspectiva d'indigenas ed indigens saja enorm impurtanta. Perquai sajan ins sa decidì per quella rolla da piunier en il chantun Grischun, e da dumandar la populaziun da la regiun Partenz/Tavau davart la percepziun dal turissem e l’acceptanza. Ed er sche las 1'525 persunas che hajan participà a la retschertga online sajan da principi cuntentas, mussian ils resultats er potenzial da svilup.
Igl è bel da vesair ch'i dat ina gronda acceptanza. Ins è da princip avert envers il turissem. Ma ins vesa era che quai è in cler «gea, però... », e betg in gea senza cundiziuns.
Ils resultats
La relaziun persunala cun il turissem influenzescha essenzialmain la tenuta: Pli ferma che questa relaziun – professiunala u privat – è, e pli positiva che la percepziun è. A questa conclusiun vegn in studi da la Scola auta spezialisada dal Grischun per incumbensa da la regiun turistica Partenz/Tavau.
Circa dus terzs da las persunas indigenas vivan e lavuran en la regiun. En spezial èsi en il commerzi, en il sectur da la sanadad ed en il turissem. Persunas che lavuran en il turissem han savens in segund job en branschas parentadas.
70% da las participantas e dals participants da la retschertga fan regularmain diever da purschidas turisticas, quai che ha consequenzas positivas per lur opiniun. En territoris main turistics sco il Partenz Anteriur (Grüsch, Schiers, Seewis) datti dentant dapli critica, cunzunt envers l'augment da traffic.
Ulteriurs quitads èn il rument, la grevezza da la natira ed ils pretschs creschents. Las consequenzas culturalas dal turissem vegnan valitadas pli variabel: Ils ins teman ina perdita da lur identitad, ils auters vesan ina schanza per mantegnair las tradiziuns.
Nus essan fitg cuntentas cun la quota da return da la retschertga. Cun las participantas ed ils participants cuntanschids pudain nus illustrar fitg bain la populaziun totala da la regiun.
En la regiun Partenz/Tavau vegn il turissem considerà sco impurtant. Var 80% da la populaziun han ina tenuta positiva fin fitg positiva envers ils giasts, entant che mo 5% han in punct da vista negativ.
La constellaziun persunala gioga ina rolla decisiva: Persunas che han privat u en vita professiunala contact cun il turissem èn per regla pli positivas envers la branscha. Entant che las persunas cun pauc connex han tendenzialmain opiniuns pli negativas.
Interessant è: Schegea che 44% dals interrogads manegian ch'il turissem haja dapli avantatgs che dischavantatgs, giavischan 40% pli pauc turissem en l'avegnir. Be 21% vulessan dapli. La maioritad resta indecisa. Quai mussa, quant cumplex ch'il tema è. Critica datti cunzun per occurrenzas grondas sco il Forum mundial d'economia WEF, il traffic u era la mancanza da spazi d'abitar pajabel
Il studi vegn a la conclusiun ch'ins pudess persvader questas persunas indecisas cun in ulteriur svilup intenziunà dal turissem. Uschia ha il president dal forum da la regiun Jürg Kessler annunzià da furmar ina gruppa da lavur. Quai per sviluppar ina strategia da turissem fin la fin dal 2026. In turissem da qualitad enstagl da quantitad.