La hotellaria grischuna ha nudà il matg 144'856 pernottaziuns. Quai èn entant 16% dapli pernottaziuns ch'anc il matg avant la crisa. Cumpareglià cun il matg passà, nua ch'il turissem è stà limità fitg pervia da las restricziuns da viadi èn las cifras s'augmentadas per passa il dubel (+ 112%).
Cumpareglià cun il 2019 mancan anc adina 1 milliun pernottaziuns en Svizra
Guardà sur l'entira Svizra sa muventan las cifras però anc adina sut quellas d'avant la crisa. Il matg ha l'uffizi federal da statistica dumbrà radund 2 milliuns pernottaziuns. Quai èn 1,4 milliuns dapli ch'il matg da l'onn passà. Cumpareglià cun il matg 2019, mancan però anc adina 1 milliun pernottaziuns.
Ils giasts da l'exteriur turnan plaunsieu puspè
Cun 1,6 milliuns pernottaziuns è la gronda part sco gia ils mais passads ida sin il conto dals giasts indigens. Er tar ils giasts da l'exteriur hai cun in plus da 353'000 pernottaziuns puspè dà dapli schlantsch. Il matg èn surtut giasts da la Germania vegnids en Svizra. Quai suandà da quels dals ulteriurs pajais vischins sco la Frantscha, l'Italia e l'Austria.
