Las entradas or dal turissem èn stadas l'onn passà uschè bassas, sco dapi l’entschatta dals onns 1990 betg pli. Cumpareglià cun l'onn 2019 è la svieuta sa reducida per radund 48%, sin anc 9,4 milliardas francs.
Il medem mument èn era las expensas da la populaziun svizra per viadis en l’exteriur sa sminuidas per bunamain la mesadad – sin 9,7 milliardas francs.
Perdita massiva da pernottaziuns
Il dumber da pernottaziuns da giasts da l’ester è sfundrà il 2020 per dus terzs, cumpareglià cun l’onn avant. Ed il traffic da viagiar cun pernottaziuns ha nudà ina perdita da betg main che 56%, sco l’Uffizi federal da statistica scriva.
Las davosas cifras che pertutgan il Grischun
L'hotellaria en il Grischun ha nudà durant ils mais d'enviern november fin avrigl 2'251'791 pernottaziuns. Quai è ina sminuziun da 6,5%, cumpareglià cun la medema perioda da l’onn avant.
