Il Grischun profitia dals blers osps svizzers. Quai ha ditg il directur da Svizra Turissem, Martin Nydegger, envers RTR. Ils blers osps svizzers sajan vegnids l'onn passà – ed els vegnian er quest onn durant la stad en Grischun.
Malgrà che bleras svizras e svizzers fetschian anc adina vacanzas en la patria na profitescha betg mintga regiun da quai. Uschia saja vinavant d’observar che surtut regiuns alpinas possian beneventar la gronda part dils giasts. En las citads sco Turitg, Basilea, Berna, Lucerna o Genevra saja anc adina grev da cumpensar la mancanza da turissem internaziunal o da commerzi.
Giasts esters vegnan a vegnir pass per pass
En tut il pajais saja la dumonda dad osps svizzers gronda. Dentant er da l'ester vegnian dumbradas dapli cudeschaziuns. Da la Frantscha quinta Svizra Turissem uschia cun in plus da 20%, cumpareglià cun l’onn passà. Tar giasts tudestgs vegn spetgà in plus da 15%. Grazia a las schluccadas dal Cussegl federal sajan er las prognosas da las destinaziuns pli lontanas bunas.
Quai che pertutgia ils martgads ch’èn pli lunsch davent, sco per exempel l’Asia, dovria dentant anc in zic temp fin ch'ils giasts arrivian puspè.
Anc betg las cifras d'avant la pandemia
Er sche la svizra saja en buna via, na sa possian ins betg congualar las cifras cun il 2019. Quel saja stà in onn istoric. Sch’ins riva dentant sin 80% durant ils proxims duos enfin trais as possian ins esser cuntent.
