La tur serva per far tests dals products che la firma CEDES producescha. La firma fundada il 1986 è il dumber in per sensurs da glisch e chips che vegnan duvrads per il manaschi d'ascensurs. Uschia furnescha la firma ils products en tut il mund ed il CEO Christian-Eric Thöny maina ina interpresa cun radund 400 collavuraturas e collavuraturs.
La tur per simbolisar l'innovaziun
Per Christian-Erik Thöny simbolisescha la tur da test la fermezza d'innovaziun da la firma. Il 2006 cura che la tur è vegnida prendida en funcziun era quai la tur da test cun il pli spert ascensur. Per pudair sviluppar ils products e betg surlaschar l'innovaziun ad autras firmas saja quest pass stà da ses antecessur e fundatur da la firma Beat De Coi in pass impurtant. Sco simbol per Landquart na vesa Thöny dentant betg la tur – er sch'el saja losch dad esser a la testa da quella firma.
