Cun l'avertura dal praschun Cazis Tignez avant tschintg onns ha l'Uffizi chantunal per l'execuziun giudiziala (Justizvollzug) survegnì blera lavur. Quatter giadas dapli persunas lavuran là e guardan per trais giadas dapli praschuniers sco anc en il Sennhof. Praschunieras e praschuniers ord 16 chantuns èn a Cazis Tignez u en la praschun Realta. En tut l'uffizi lavuran var 200 persunas en l'uffizi. Cun quai ch'en il 2026 van pliras persunas en funcziuns-clav en pensiun, hai duvrà ina strategia per il futur.
Cun success avain nus fabritgà si la praschun Cazis Tignez. Uss vai per far il manaschi pront per il futur.
Tenor l'analisa sajan las finamiras da segirezza e d'execuziun sco cuntanschidas. Ins possia bain tegnair la balantscha tranter segirezza, urden e resocialisaziun dals praschuniers. Basegn d'agir dettia dentant en ils secturs svilup digital, cultura d'organisaziun e gestiun da persunal. Plinavant possian ins nizzegiar dapli sinergias tranter las instituziuns penalas Cazis Tignez e Realta.
Svilup dal persunal e digitalisaziun
In punct central è il svilup dal persunal. Il departament da persunal existent vegn engrondì per dumagnar la mancanza da spezialists e las autas pretensiuns da furmaziun. La transfurmaziun digitala pretenda ulteriuras resursas per promover il transfer da savida entaifer il persunal. Er il transfer da know-how – ina part impurtanta per scolar nova glieud – duai vegnir meglierada.
Per il 2026 è planisà in process strategic per rinforzar la posiziun en il concordat d'execuziun penala da la Svizra orientala. In nov concept da communicaziun duai meglierar la communicaziun interna ed externa.
Midada en la direcziun da l'uffizi
Il directur actual Mathias Fässler va il 2026 en pensiun. Il post vegn las proximas emnas scritta or. Il svilup da la strategia ed er ina eventuala restructuraziun vegnissan pir fatgas suenter ch'ina nova persuna è en uffizi.
Adattà al tema