Sut il motto «pitschen ma prezius» ha il Christkindlimarkt a Cuira er lieu quest onn. Questa giada ha la fiera però be lieu cun 12 stans da vendita empè da enturn 40. Era dal program accumpagnant ha il comité d'organisaziun stuì desister.
Fiera da Nadal sut l'ensaina da corona
Il comité d'organisaziun ha tuttina vulì pussibilitar als visitaders l'usitada atmosfera da Nadal. Cler che quai n'è betg stà uschè simpel cun la situaziun actuala. Per che quai saja tuttina pussaivel ston ils visitaders sa tegnair vi da las mesiras da segirtad. Vul dir: tegnair distanzas da 1,5 meters nua ch'igl è pussaivel e purtar ina mascrina sche quai n'è betg pussaivel.
Per ch'ins sappia er giudair insatge da mangiar u in vin chaud ston ils visitaders seser durant la consumaziun. Ultra da quai pon ins quest onn er empustar il vin chaud a chasa.
Il Christkindlimarkt ha cumenzà ils 27 da november e cuzza enfin ils 23 da december.
