Era sch'ins auda per il mument dapertut che bleras persunas èn malsaunas e ch'ellas èn gia dapi dis en letg, na saja la situaziun betg ordvart speziala, di la media chantunala Marina Jamnicki.
Tenor mai è questa unda da grippa tuttavia cumparegliabla cun quella da l’onn passà.
Ch'il tema grippa dettia tuttina da discurrer uschè bler per il mument ha tenor ella era da far cun la pandemia da corona. L’attenziun saja pli auta dapi corona. Ins saja pli attent, sch’ins è malsaun, ed ins realisescha quai era pli ferm. Perquai discurr'ins era dapli da quai.
Las statisticas da l'Uffizi federal da sanadad BAG mussan ch’igl è stà ils ultims onns adina circa medem. Qua en il Grischun èn quest onn a l'entschatta da schaner en la statistica dal BAG vegnidas dumbradas 78 persunas cun grippa. Ins sto però er menziunar che betg tut quellas persunas ch'han gì ina grippa èn idas tar il medi per sa laschar registrar, di Marina Jamnicki.
L'onn passà saja il dumber maximal cun 61 persunas stà levamain pli bass. Il punct culminant da quest onn na saja però betg anc cuntanschì.
In nov virus da grippa
Tenor il BAG vegnan en Svizra per il mument inditgads ils dus virus d’influenza dals suttips «A(H3N2)» ed «A(H1N1)pdm09». Ultra da quai circulescha er ina nova sutclassa dal suttip H3N2, sco quai che analisas e retschertgas dal BAG mussan. Tenor la media chantunala Marina Jamnicki na dettia però nagin motiv da far quitads:
Per il virus da grippa èsi normal ch’el mutescha savens. Ina giada è in virus derasà, in'autra giada in auter. Tar nus n'èn dentant vegnids annunziads anc nagins cas spezialmain gravants.
Sco adina valan pia las medemas reglas: lavar e dischinfectar ils mauns, starnidar en il cumbel e tegnair distanza. E sch'ins ha lura tuttina il sentiment da vegnir malsaun – lura saja impurtant da star a chasa e da far la pausa e curar la grippa.
