Siglir tar il cuntegn

Header

cuntegn

Unda da stad e prevista atun Coronavirus – la situaziun n'è betg alarmanta

Unda da stad: Las cifras d’infecziuns cun il coronavirus creschan per il mument. Entant na datti però nagin motiv da temair che la situaziun pudessia surchargiar ils ospitals. Da quel avis èn tant l'Uffizi federal da sanadad sco era l'epidemiolog da l’Universitad da Berna Christian Althaus.

Era sche in'infecziun cun il coronavirus na po betg vegnir evitada – grazia a l’immunisaziun da la populaziun cun vaccinar e tras in'infecziun cun il coronavirus pon blers cas grevs e mortoris vegnir evitads; quai era cun la nova varianta dal coronavirus BA.5 che sa derasa per il mument. Dentant per pudair valitar la dimensiun da l’unda da stad, stoppian ins sco emprim observar la dinamica sur in temp, di Parham Sendi, spezialist d'infecziuns tar l'Uffizi federal da sanadad.

audio
Essan nus pronts per l'atun?
aus Actualitad vom 22.06.2022.
abspielen. Laufzeit 3 minutas 15 Sekunden.

Ch’ins stoppia emprender da viver cun il virus saja stà cler gia baud durant la pandemia, manegia l’epidemiolog da l’universitad da Berna Christian Althaus. Undas sco quella uss vegnia adina puspè a dar. Da dir, tge che spetga dentant anc l'atun, cura che las temperaturas vegnan puspè pli fraidas, saja grev. La probabilitad che l’immunisaziun gida era cunter novas variantas è gronda, dentant betg segira. Nagin po prevesair, co il virus sa sviluppa, e tge mesiras che fan da basegn, u betg.

audio
Epidemiolog Christian Althaus davart la situaziun actuala
aus Actualitad vom 22.06.2022.
abspielen. Laufzeit 3 minutas 28 Sekunden.

Actualmain regia entaifer la societad ina ruassaivladad che saja cumadaivla, manegia il psicolog da cumportament, Christian Fichter. Quella haja dentant era privels. Sch'i dat ulteriuras restricziuns ils proxims mais, lura vegnia puspè a dar ina spartiziun da la societad. Pia tranter quels che van d'accord cun las restricziuns, e quels ch'èn encunter cumonds u scumonds dal stadi.

audio
Psicholog da cumportament davart las tensiuns en la populaziun
aus Actualitad vom 22.06.2022.
abspielen. Laufzeit 2 minutas 51 Sekunden.
Jau crai che la dispita – che fa actualmain pausa – vegn puspè a cumenzar. E quai forsa cun ina nova intensitad.
Autur: Christian Fichter psicolog da cumportament

Sco emprim èsi dentant da guardar, quant ferm ch'il coronavirus vegn insumma a turnar ils proxims mais. Pir lura vesan ins, quant grondas che las tensiuns en la populaziun vegnan ad esser.

Situaziun actuala fa paucs quitads al Grischun

Il coronavirus para actualmain durant la stad pulit lunsch davent. Tranter 30 e strusch 100 cas da corona per di datti actualmain en il Grischun. La situaziun saja fitg survesaivla. Ed er ils ospitals han mo paucs pazients e pazientas da corona.

Era en las chasas da tgira èsi actualmain ruassaivel, sco quai che pliras instituziuns han ditg sin dumonda da RTR. Ma tuttina èn lezzas occupadas. A Glion, per exempel, manchia in zic la survista, quants cas da corona ch'i dettia tenor regiun, di la manadra Claudia Tomaschett. Els n'hajan betg pli las medemas infurmaziuns sco avant, cura ch'i deva anc il dashboard dal chantun Grischun. Lura vesevan ins exact, quants cas ch'i deva en tge regiun dal chantun. Actualmain saja bler intschert.

Cura ch'i deva il dashboard grischun, vesevan nus il trend e pudevan reagir.
Autur: Claudia Tomaschett manadra chasa da tgira Glion

Il chantun sez n'haja betg survegnì resuns da chasas da tgira che giavischassan enavos il dashboad, declera Peter Peyer. Tenor il cusseglier guvernativ na saja quai er betg necessari, perquai che las cifras da corona sajan bassas. Ma cler, sche las cifras giessan ad aut, ed i dess il giavisch, lura pudess il chantun reactivar il dashboard. Peter Peyer na vul dentant betg guardar memia fitg en las stailas.

audio
Situaziun actuala da corona en il chantun Grischun
aus Actualitad vom 21.06.2022.
abspielen. Laufzeit 3 minutas 12 Sekunden.
Nus avain ussa bunamain trais onns experientscha e savain, tge mesiras che gidan e tgeninas betg.
Autur: Peter Peyer minister da sanadad GR

Datti novas variantas? Co vegnan lezzas a tutgar il Grischun? Tut puncts che n'èn betg clers. Ma en il cas che la situaziun vegniss puspè mendra, fiss il chantun pront, di Peter Peyer.

RTR actualitad 08:00

Artitgels legids il pli savens

Scrollar a sanestra Scrollar a dretga