La limitaziun d'uffizi prevesa che Tarzisius Caviezel dat giu ses post sco president e survegn in successur u ina successura. Quella persuna duai vegnir elegida ils 23 matg tar la 111avla radunanza da delegads a Mustér. Il pli aut chatschader grischun banduna ses post cun pleds diplomatics.
Jau hai gì grond plaschair da far quai ed uss hai in egl trest ed in cuntent da serrar giu.
Dus temas ch'eran durant il temp d'uffizi adina puspè actuals, èn il luf e la discussiun dals calibers da chatscha. Il chantun Grischun è l'unic chantun che pretenda la chatscha cun calibers gronds da 10,3 millimeters. Avant in onn avevan ils delegads vuschà cunter in midament da calibers. Quai pervia da la vusch da tagl da Tarzisius Caviezel. Era sch'el persunalmain fiss er per ina midada.
La suprastanza era cunter la midada da calibers. Lura na pos jau sco president betg decider auter.
Era il luf è stà ed è anc adina in tema da discussiuns tranter ils commembers da l'uniun. Per il president èsi cler. Il luf è part da la natira grischuna e vegn era a restar anc in temp. Ins haja d'emprender d'ir enturn cun la situaziun. Impurtant saja che la populaziun na daventia betg memia gronda. Perquai sustegnian els era l'Uffizi chantunal da chatscha cun la regulaziun.
Il luf è vegnì natiral en Grischun e n'è betg vegnì mess ora. Nus stuain emprender da viver ensemen.
