Ils Dis da litteratura, l'acquisziun da commembers, midadas en suprastanza e sfidas finanzialas han marcà l'onn passà da L'Uniun per la litteratura rumantscha. In grond rumpatesta èn las finanzas; l'onn passà ha la ULR fatg in minus da stgars 13'000 francs.
L'onn passà n'è internamain betg stà in simpel per l'Uniun per la litteratura rumantscha.
Ins stoppia dentant relativar, di Manuela Balett, 10'000 francs da quest minus haja l'ULR impundì per sustegnair ils Dis da litteratura a Domat, suenter che la suprastanza dals Dis da litteratura aveva demissiunà.
In ulteriur motiv è ch'i ha mancà differentas contribuziuns da fundaziuns per il project litteratura en il 2024. En pli hai dà difficultads cun ils pajaments dals commembradis. La ULR haja dentant avunda chapital per vertir quest deficit dal onn passà e la suprastanza haja guardà per pliras mesiras per puspè bajegiar si la facultad. Per il 2025 è vegnì budgetà in quint equilibrà.
Dumonda per daners dal chantun
L'uniun ha dumandà il chantun per in contract da prestaziun da 20'000 francs ad onn. En il rom «concept per promover la cultura» ha il Cussegl grond empermess meds en l'autezza da trais milliuns francs per onn a la cultura grischuna. L'ULR n'ha anc betg survegnì ina resposta, ma Manuela Balett è da buna speranza. Entras quest sustegn pudessi la ULR prender en ina rolla pli impurtanta per unir, promover e professiunalisar la litteratura rumantscha.
L'uniun e la suprastanza enturn Manuela Balett, Walter Roselli, Rico Valär e Flavia Hobi guarda positivamain en l'avegnir, er grazia al sustegn da las commembras e dals commembers.
Sur ils onns ha mintga uniun sias difficultads, pens jau – era l'ULR ha ussa gì ina tala fasa.
Il proxim grond punct da program èn ils Dis da litteratura il cumenzament da november. Quels han lieu per l'emprima giada en la Postremise a Cuira e betg pli a Domat.