L’entschatta da l’onn ha l’uvestg da Cuira, Joseph Maria Bonnemain annunzià che Papa Leo XIV ha approvà sia dumonda per in uvestg auxiliar. Quai per sustegner el en sia lavura en l’uvestgieu da Cuira. Udì n'han ins dapi lura dentant nagut pli, quai fin la davosa fin d'emna cura ch’il Blick da la dumengia ha scrit che pader Andri Tuor duai daventar quest uvestg auxiliar. Ina funtauna concreta n’è dentant betg vegnida numnada.
L’uvestgieu da Cuira na leva betg commentar las speculaziuns e renviescha al secret papal. Tar persunas che s’engaschan en l'uvestgieu da Cuira per la baselgia catolica procuran quellas speculaziuns enturn pader Andri Tuor per differentas reacziuns.
Persuna ideala e cumpetenta
In uvestg auxiliar Andri Tuor fiss ina buna nova, è per exempel stà d'udir. Persunas ch'enconuschan el il pli datiers discurran perfin d'ina tscherna optimala. El saja ina persuna fitg capabla, ruassaivla che pudess sustegnair l'uvestg Bonnemain, che festivescha la fin dal mais 78 onns, en blers secturs.
Per auters fiss l'elecziun da pader Andri Tuor er ina surpraisa, era sche ses num saja gia crudà en connex cun la successiun d'uvestg Vitus Huonder. Tschertas dumondas avertas dettia quai che pertutga las incumbensas ch'el duai surpigliar. Perina èn las bleras persunas dumandadas che pader Andri Tuor cumplettass fitg bain l'uvestg Joseph Maria Bonnemain. Omadus hajan in cumportament amiaivel e simpatic envers ils conumans.
Demissiun andetga procura per dumondas
I dat dentant er vuschs criticas. Per tschertins è pader Andri Tuor in pau ina blackbox, ina persuna ch'ins na sappia betg propi vida tge ch'ins saja. Els menziuneschan sia demissiun sco rectur da la scola claustrala dad Engelberg, che haja gia procurà per canera e malaveglia ed haja laschà enavos l'impressiun ch'i haja dà conflicts entaifer la cuminanza benedictina. I dettia dubis ch'el saja la persuna adattada per l'incumbensa sco uvestg auxiliar.
Papa Leo pudess decider bainprest
Da vart da l'uvestgieu hai gì num ch'i sperian sin ina decisiun dal Papa anc avant Feragosto, vul dir ils 15 d'avust. Il dossier saja gia in detg mument a Roma tar il ‘decasteri per fatgs dals uvestgs’, il post responsabel per talas elecziuns. Era hajan lezs gia fatg las retschertgas necessarias. Tut dependia uss da Papa Leo che haja il davos pled.
D’autras funtaunas è stà d’udir ch’i pudess ir spert. Gia ils proxims dis pudess la decisiun crudar cunquai che la gruppa da persunas infurmadas en chaussa creschia cuntinuadamain.
Betg exclus saja dentant che l'elecziun vegnia anc retardada. Tar la Curia a Roma regnan atgnas reglas. Ils uvestgieus da Vaduz e da Lugano spetgan per exempel gia dapi 3 onns sin in nov uvestg.