Il chantun Grischun surpiglia ils custs per la vaccinaziun cunter Covid-19 en apotecas. Quai fin la fin da zercladur da quest onn. Sco quai che l'uffizi da sanadad chantunal scriva, pon las apotecas uschia vinavant porscher la vaccinaziun. In servetsch che saja s'etablì fermamain en la populaziun. La populaziun apprezieschia il servetsch da las apotecas localas. L'atun da 2023 avevan radund 1'500 persunas laschà vaccinar en 14 apotecas.
Ils custs per la vaccinaziun cunter Covid-19 en las praticas da medi surpiglia vinavant la Confederaziun. Fin la fin dal 2023 aveva la Confederaziun era pajà las vaccinaziuns en apotecas.
Vaccinaziun impurtanta per persunas spezialmain periclitadas
Experts recumondan cunzunt l'atun e l'enviern a persunas spezialmain periclitadas da laschar vaccinar cunter Covid-19. Tar questa gruppa tutgan persunas pli veglias che 65 onns, persunas pli veglias che 16 onns cun malsognas cronicas e cun trisomia 21. Per persunas spezialmain periclitadas è il risico pli aut da vegnir grev malsaun suenter in'infecziun cun Covid.
