In zic pli tard ch'usità è Heidi Altweger turnada sin la chamona Sasc Furä en la Val Bondasca. Il fanadur è ella vegnida reaverta. In mument emoziunal per la guardiachamona suenter che la chamona ha stuì vegnir evacuada suenter las bovas dal 2017 e suenter che la chamona è restada serrada la stad passada.
Jau ma legrava da turnar sin chamona, hai dentant era gì sentiments maschadads.
Las regurdanzas accumpognan adina Heidi Altweger. Las regurdanzas als dis la fin d'avust 2017, nua che plirs milliuns m³ crappa èn sa distatgads dal Piz Cengalo ed èn passads en furma da duas grondas bovas giu per la Val Bondasca fin a Bondo ed han tratg cun sai otg viandants. Regurdanzas, ch'ella ha stuì metter in pau da la vart durant la stagiun. Ina chaussa haja però propi fatg trista:
Surtut ils telefons cun ils guardiachamonas da la chamona Sciora han ma mancà questa stad e quai ha ma fatg daventar in zic melanconica.
Auter che la chamona Sasc Furä n'ha la chamona Sciora, l'autra chamona en la Val Bondasca, betg pudì vegnir reaverta. Ed era la Sasc Furä be grazia ad ina nova senda, ch'è vegnida construida questa primavaira. La veglia senda passava tras la val, ch'è anc adina serrada. La nova senda è pli lunga e pli difficila, per part classifitgada sco senda autalpina.
Pli paucs giasts
Vegnids en chamona è surtut alpinists e rampignaders, declera Heidi Altweger. Quels damai che nizzegian la chamona sco punct da partenza per turas al Piz Badile. Quai saja gia pli baud stada la clientella principala, haja dentant sa rinforzà questa stad.
Tuttina: jau sun cuntenta cun la stad. Ella è stada uschia sco jau hai pensà ch'ella saja.
Dapi bundant in mais è Heidi Altweger puspè en val. Ella ha dentant bandunà la chamona cun la clera finamira da turnar era la proxima stad puspè.
RR actualitad 06:00
