- En la regiun Moesa datti indizis per cunvegnas da pretschs. Avant in onn ha la WEKO lantschà las inquisiziuns.
- Entant è il dumber da firmas involvidas creschì sin sis.
- Quatter da las firmas involvidas han sedia lur sedia principala en Grischun e duas en il Tessin.
La WEKO ha schlargià en la regiun Moesa sias inquisiziuns pervi d'eventualas cunvegnas da pretschs ch'ella aveva lantschà avant radund in onn. I deva indizis che trais ulteriuras firmas sajan cumpigliadas, duas da quellas en il Tessin ed ina en la regiun Moesa. I sa tracta da cas actuals da l'onn 2020.
Uss èn ils nums da quellas firmas da construcziun enconuschents. Da nov sa fatschenta la WEKO uss cun la firma grischuna Bonadei & Cereghetti SA cun sedia a Grono. Sco igl è vinavant da leger en il Fegl uffizial federal èn vitiers involvidas la firmas Rigassi e Pinchetti SA e la Mancini & Marti SA, omaduas cun sedia en il Tessin.
Gia enconuschent era che las trais firmas Censi e Ferrari SA impresa costruzioni, Savoini Attilio SA e F. Ili Somaini SA, da la regiun Moesa sajan suspectadas. Per tuttas firmas vala la presumziun d'innocenza.
WEKO stada surstada
Cura ch'igl era vegnì enconuschent avant in onn, ch'i dettia danovamain indizis per cunvegnas da pretsch, era la WEKO sa mussada surstada. Ils ultims onns han ins adina puspè pudì leger lingias grassas davart cartels en Grischun. Diesch inquisiziuns davart cunvegnas ha la WEKO gia fatg en Grischun.
PUK ha pir dacurt finì sia lavur
La PUK dal Cussegl grond che aveva investigà sch'il chantun saja stà involvì en il cartel da construcziun, ha pir dacurt serrà giu sia lavur ed è vegnida schliada. Il segund rapport aveva mussà che superiurs da l'Uffizi da construcziun bassa avevan violà lur duairs. La PUK ha sinaquai fatg diversas propostas per evitar talas cunvegnas en avegnir. Tranter auter vul ella in post da mediaziun extern.
