La Viafier retica ha transportà l'onn 2023 bunamain 16 milliuns passagiers e passagieras. Quai saja in record, scriva l'interpresa a chaschun da la bilantscha da l'onn. Uschia hajan ins realisà en quest segment in gudogn da 9,4 milliuns francs. Ina buna part hajan las lingias turisticas e da temp liber contribuì. Per exempel haja l'express dal Bernina medemamain transportà uschè blers osps sco anc mai – passa 350'000.
La bilantscha 2023 è la meglra cumpareglià cun il temp passà.
Cun 535'000 autos haja era dà in record tar il transport d'autos tras il Vereina. Uschia ch'er il transport d'autos ha realisà in resultat positiv. Era cun las participaziuns al Glacier Express ed il Panoramic Gourmet e da las immobiglias ha la Viafier retica pudì profitar da buns resultats.
Records portan sfidas
Perquai che quest trend cuntinuescha fin uss era l'onn actual – la dumonda per prestaziuns da la Retica cuntinuescha a crescher – resta er il basegn da modernisar ed augmentar la purschida. Uschia èn er previsas en l'avegnir autas investiziuns quai che munta dapli lavur per il persunal.
La pli gronda sfida en l'avegnir vegn ad esser la mancanza da persunal.
Deficits en las spartas transport da rauba ed infrastructura
Cifras cotschnas ha l'interpresa preschentà tar il transport da rauba sco era tar l'infrastructura. Quai cunzunt pervi dals auts custs d'energia e custs da persunal supplementars sco era cun il grond volumen d'investiziuns.