Glion: reelecziun da president e suprastanza
Il suveran da Glion ha reelegì Marcus Beer sco president communal, quai cun 415 vuschs, il pli absolut è tar 333 vuschs. El n'ha gì nagin cuntracandidat. Er las quatter persunas en suprastanza n'han gì nagina concurrenza ed èn vegnidas reelegidas. Persuenter datti midadas en il parlament da Glion, cunquai che blers sezs eran vegnids libers. Per occupar tut ils sezs dovri in segund scrutini.
Zezras: Daniel Freund resta president communal
Per la perioda d'uffizi 2026 fin 2028 han las votantas ed ils votants reelegì Daniel Freund cun 560 vuschs – il pli absolut era tar 417. Il president en uffizi ha survegnì concurrenza da dus candidats – quels èn dentant stads senza schanzas. Georges Clement ha survegnì 150 vuschs e Florin Castelberg ha survegnì 28 vuschs.
Ultra da quai ha il suveran da Zezras approvà la revisiun da la lescha davart il provediment d'aua e la revisiun da la lescha davart l'allontanament d'auas persas.
Domat: suveran decida cuntrari a cussegl communal
Il suveran da Domat ha refusà la revisiun parziala da la planisaziun locala, quai cun 55,7% (823 vuschs Na, 656 vuschs Gea). La participaziun a la votaziun è stada tar 30%. Domat vuleva surlavurar la planisaziun locala per pudair porscher dapli spazi da viver. Enstagl da crear novas zonas d'abitar era l'idea da nizzegiar meglier ils quartiers existents. Era per manaschis vuleva la vischnanca uschia daventar pli attractiva, quai cun crear ina nova zona d'industria en il Vial e cun engrondir la zona d'industria existenta Paleu Sura.
Il suveran decida pia cuntrari al cussegl communal. Lez aveva gia approvà la revisiun parziala.
Surses po realisar il «Juliertrail»
Il suveran da Surses ha approvà in credit d'impegn da 1,45 milliuns francs per il «Juliertrail», la senda da viandar e mountainbike sur il Güglia, quai dentant stretg cun 51,2% da las vuschs. La fatschenta ha stuì vegnir suttamessa a l'urna perquai ch'il referendum era reussì. La radunanza communala da Surses aveva approvà il credit d'impegn il december 2024.
Samedan refusa il project d'integrar l'ospital regiunal en quel da Cuira
Il suveran da Samedan na vul betg integrar l’Ospital regiunal d’Engiadin’Ota en l’Ospital chantunal a Cuira. Cun 427 cunter 364 vuschs ha il suveran refusà il project d’integraziun.
Puntraschigna: Gea a fusiunar l'ospital ed sanar la scola
Cuntrari a Samedan han decis ils votants e las votantas da Puntraschigna – cun 400 cunter 176 ha il suveran approvà l'integraziun da l'ospital regiunal. Tut las 11 vischnancas purtadras han da decider en chaussa. Sco davosa vischnanca decida Zuoz – ils 27 da matg. Fin uss han sis vischnancas ditg Gea al project e quatter Na. Per realisar il project avessan tuttas vischnancas stuì dar lur consentiment.
A Puntraschigna po vegnir sanada ed engrondida la chasa da scola suot. Las votantas ed ils votantas han approvà il credit da project da 9 milliuns francs – quai cun 83% da las vuschs. La chasa da scola è vegnida bajegiada avant radund 125 onns e la davosa sanaziun da l'intern è stada avant passa 60 onns. Oravant tut ils tetgs e las lingias ston vegnir sanadas ed i duai dar ina optimaziun energetica dal bajetg.
Scuol: Gea a meglieraziun e diever da vias champestras e da guaud
Las votantas ed ils votants da Scuol han dà glisch verda a la meglieraziun d'Ardez e Guarda – els han approvà la lescha correspundenta cun dapli che 85% da las vuschs. Avant in onn aveva decis la radunanza communala da realisar la meglieraziun da las fracziuns d'Ardez e Guarda.
Plinavant han ils votants e las votantas da Scuol approvà cun radund 78% da las vuschs la revisiun parziala da la lescha per il diever da las vias champestras e las vias da guaud cun vehichels a motor.
Plinavant hai dà in'elecziun substitutiva per la cumissiun sindicatorica – Chasper Sarott è vegnì elegì per quest post.
Vaz: Gea a credit da sanar l'implant da fermada Heidsee
A Lai pon ins sanar l'implant da fermada dal Heidsee che na correspunda betg pli a las pretensiun da segirtad pertutgant auas gronds e terratrembels. Il suveran da Vaz-Obervaz ha perquai approvà in credit d'impegn da radund 9,7 milliuns francs, quai cun dapli che 85% da las vuschs. Senza la sanaziun lubescha l'Uffizi federal per energia il manaschi mo pli fin la fin dal 2027.
Churwalden survegn nova constituziun
Dapli che 15 onns suenter la fusiun da Churwalden cun Malix e Parpan survegn la vischnanca da Churwalden ina nova constituziun. Las votantas ed ils votants han approvà la revisiun totala da la constituziun communala – quai cun bunamain 81% da las vuschs. Cunquai han ins era cuntanschì la maioritad da dus terzs necessaria. La revisiun totala vul modernisar la constituziun per pudair optimar l'organisaziun da la vischnanca da Churwalden.
Bregaglia: Gea a concessiun d'aua
L'interpresa Cuorta Bau GmbH da Schlarigna po utilisar l'aua da l'aual Carpeia en Bregaglia per la chava da crappa «Nasiè-Cludan». Las votantas ed il votants da la vischnanca da Bregaglia han approvà la concessiun d'aua – quai fitg cler cun 92,5% da las vuschs. Questa concessiun d'aua dovra l'interpresa Cuorta Bau per survegnir la permissiun da construir la chava da crappa.
Grono survegn in bogn avert
La vischnanca da Grono po construir in bogn avert public da radund 25 meters lunghezza sin l'areal da la plazza da ballape existenta. Il suveran ha approvà il credit correspundent da 4,95 milliuns francs, quai cun dapli che 68% da las vuschs. Suenter che la vischnanca da Grono ha stuì sbittar il project da construir in center da sport regiunal a Leggia, aveva il cussegl communal incumbensà l'executiva da tschertgar in'alternativa per pudair construir in bogn avert.
Claustra accepta duas novas leschas
Il suveran da Claustra ha ditg cleramain Gea a duas novas leschas che stattan en connex cun la nova constituziun communala ch'è ida en vigur il schaner 2025, scriva la vischnanca.
- L'emprima lescha reglescha l'organisaziun ed ils pensums da las autoritads communalas e da l'administraziun communala. Tranter auter duai il pensum da lavur dal president communal vegnir auzà da nov sin 80% fin 100%. Ed er la paja dal president communal duai crescher per ch'ins chattia meglier candidatas e candidats qualifitgads. Il suveran ha acceptà questas midadas cun 72%.
- Era la segunda lescha han ils da Claustra acceptà, quai cun 71%. Quella vul concretisar ils dretgs politics dals burgais e las burgaisas (votaziuns, elecziuns, iniziativas, referendums, relaschadas d'uffizi). Per quest intent duai la lescha existenta vegnir simplifitgada ed adattada al dretg chantunal.
Favugn ha approvà il quint 2024
Ils abitants e las abitantas da Favugn han approvà a l'urna il quint annual dal 2024 – quai cun 352 cunter 19 vuschs. La participaziun a la votaziun è stada tar 19,5%. Il quint annual dal 2024 da Favugn ha serrà nunspetgadamain cun in surpli da radund 27'000 francs. La vischnanca aveva quintà cun in deficit da radund 575'000 francs.