Entant che Mustér è anc vid eruir tge mesiras prender per spargnar energia, ha la vischnanca da Tavau gia instradà 35 differentas mesiras per far quai. Mesiras sco per exempel reducir l'illuminaziun da las vias ubain er mesiras en la hotelleria sco forsa serrar ina da trais saunas. Seewis è londervi da barattar ils pairs electrics cun LED e Küblis ha gia reducì la temperatura en bajetgs publics. Las vischnancas han differents tempos d'instradar mesiras per spargnar energia. Impurtant saja tenor il Landamma da Tavau Philipp Wilhelm da gia uss spargnar.
Sche nus cumenzain gia uss da spargnar pudain nus mantegnair pli tgunsch las purschidas publicas e turisticas.
Sa preparar per il cas d'urgenza
Dentant ston las vischnancas baud u tard er sa preparar per il cas che las purschidas na pon betg pli vegnir garantidas. Il chantun ha l'emna passada tramess a las vischnancas in manual cun recumandaziuns per il cas urgent, pia per il cas che l'electricitad stuess vegnir tschentada giu. Lura hajan las vischnancas tranter auter da guardar che lur ospitals hajan generaturs da far sez energia, che las vias da communicaziun funcziunian ubain er ch'il provediment da nutriment saja garantì per il cas che las butias stuessan serrar lur portas.
Quai fiss il cas urgent e nus na sperain e crajain betg che quel giaja en vigur, dentant per scriver il manual avain nus stuì partir dal mender cas.
