Ils brumbels da las vignas èn anc adina serrads, las vignas èn anc en il sien d'enviern. Tuttina spetga il cumissari da viticultura Walter Fromm ch'i flureschian puspè pli baud che l'onn passà, gia mez mars. Uschia vegn l'entir process spustà adina pli enavant, cun la racolta da las ivas betg pli la fin da settember, mabain gia l'avust.
Walter Fromm na pensa perquai betg che las vignas possian s'adattar a la midada dal clima: «Da l'entschatta fin a la racolta vai adina tuttina ditg, uschia na crai jau betg che questas plantas possian s'adattar insaco», uschia Walter Fromm. Cun quai s'augmenta era la schanza da donns da schelira.
I dettia pliras pussibilitads da proteger las vignas – chandailas, aria chauda u filfier che po sa stgaudar – ma nagina da questas opziuns saja ideala, manegia il cumissari da viticultura.
Nus empruvain da far fit nossa viticultura per l'avegnir – e l'avegnir è pertutgà incontestablamain dal stgaudament dal clima.
Tar in da quels projects vai per cultivar vignas, che pon tegnair ora dapli chalira e setgira. Cun ragischs da vignas dal sid, p.ex. da l'Italia u da la Frantscha, vuless il Plantahof crear in Pinot Noir che ha ragischs pli lungas e pli fermas, che chattan aua er en terren sitg. Ma malgrà la midada dal clima è il Grischun anc adina pli bletsch e fraid che l'Europa dal Sid.
Per las vignas dal 2026 na fa Walter Fromm actualmain nagins quitads. Anc è tut sco ch'i stuess esser, era la racolta dals ultims onns n'è betg sa sminuida en il Grischun. Ch'i dovria tuttina soluziuns pervia da la midada dal clima e per ina viticultura persistenta, n'ha il cumissari da viticultura entant nagins dubis.