Sin lur bain hajan els adina puspe occurenzas de er inqual hosp che baivia nagin alcohol. Uschia as haja adina puspè stuì guntgir sin auters products, di Benjamin Obrecht. Quai haja schon sgrattà in zic vi dal ego da viticultur.
La finala essan nus viticulturs. Naturlamain vulain nus preschantar in product da nossas ivas.
Perquai as hajan els decidì da far in vin senza alcohol. In rosé ed in cuvée blanc. La finamira: crear in vin senza alcohol che gusta propi sco in endretg vin. Per il vin senza alcohol collavureschan ils Obrechts cun il startup svizzer «Amesco» che ha sviluppà in proceder per retrair il alcohol dal vin.
Tar la producziun da vin senza alcohol dettia duas grondas sfidas, di Sabine Reber da «Amesco». Per l'ina dovria in bun vin d'auta qualitad sco basa, e per l'autra ina proceder da retrair l'alcohol che possia transferir l'aromatica dal vin en la varianta senza alcohol.
A Jenins produceschan ils Obrechts il vin sco usità – mo avant che las buttiglias vegnan emplenidas va el tar Sabine Reber nua ch'il alcohol vegn retratg. Perquai ch'il dovra quist pass da lavur supplementar custa il vin senza alcohol circa 10% dapli ch'in vin normal.
-
Bild 1 von 3. Benjamin Obrecht. l'iniziant dal vin senza alcohol cun ivas da Jenins. Bildquelle: RTR.
-
Bild 2 von 3. Sabine Reber. cul startup «Amesco» ha ella sviluppà ina procedura da retrair l'alcohol al vin. Bildquelle: RTR.
-
Bild 3 von 3. L'emprim vin grischun senza alcohol. l'etticetta dal cuvée blanc senza alcohol dal bain dals Obrechts a Jenins. Bildquelle: RTR.
Il dovria schon in zic curaschi da far lavur da piunier, Benjamin Obrecht che ha lantschà il vin grischun senza alcohol veza quai dentant pragmatic.
Jau crai ch'igl è meglier dad esser l'emprim che dad esser l'ultim.
Ils geniturs da Benjamin Obrecht, Ladina e Jürg Obrecht hajan adina sustegnì il project dal vin senza alcohol. Dentant haja il bab schon dumandà sch'ins na prendia betg l'olma al vin cun retrair l'alcohol. E la mamma di ch'ella haja l'emprim schon pensà scha quai saja da basigns. Ils geniturs Ladina e Jürg Obrecht èn fitg loschs che lur figl ha gì il curaschi da far quest pass.
Jau sun propi superbia da mes figl.
Cumenzà han els cun 1'400 buttiglias. Emprims tests mussian, ch'il vin senza alcohl gustia a la gieud.