Vendemia 2025 - Vendemia a Jenins – in di cun viticultur Aron Candrian

Cun la forsch d'iert van ils gidanters e las gidantras tras las vignas. Els èn collegas, parents u enconuschents dal viticultur Aron Candrian da Sagogn. A Jenins vegn quella damaun transportà ina chista suenter l'autra giu dal plaun.

Circa 10 persunas èn tranter las plantas autas e taglian giu las ivas a maun. Oz ston vegnir fatgas sis retschas da mintgamai 100 meters. Il viticultur da Sagogn è er tranter ils gidanters, ma el ha anc bler auter da far, sco per exempel organisar dapli chistas. Quest onn hai numnadamain dà bleras ivas.

En tut quinta el cun 4 fin 5 tonnas ivas – quai dettian radund 4'000 enfin 5'000 butteglias vin. Quai tuna da bler, ma quai na saja betg bler, di Aron Candrian. Auters viticulturs dal Signuradi produceschan fin 50'000 buttiglias per onn. A l'exteriur vegn schizunt producì milliuns. Tar in pitschen producent sco el, saja la qualitad dal vin dentant pli auta.

Las chistas plainas vegnan chargiadas sin in char annex. Vespras sgolan enturn las ivas ed il sulegl vegn enzuglià da nivlas grischas. Curt avant las 11 porta in'amia dal viticultur café, paunets e petta. Lura n'èsi betg pli bler da far – duas retschas mancan anc, ed en 10 èn quellas ivas svelt en ils chanasters e sin il char annex. Punctualmain per gentar èn els a fin, tuttas sis retschas èn vidas.

Las ivas porta Aron Candrian a Cuira en ses tschaler da vin, nua ch'el prenda davent il fusti e metta las ivas en ils butschins. Lura vegn si in viertgel, e las ivas han temp da fermentar – in pass da blers, fin che la buttiglia finala è sin maisa. Per tut las gidantras ch'han racoltà las ivas a Jenins, èsi gia da mezdi saira sontga e temp per stgaudar ils mauns.