Albula/Alvra
La vischnanca d'Albula/Alvra ha d'occupar da nov il post da presidi. Per la successiun da Daniel Albertin candidescha Manuela Gebert ch'abitescha ad Alvagni. Albertin vuleva gia dar giu ses uffizi da president il 2024, lura n'eri dentant betg reussì da chattar in successur u ina successura, uschia ch'el ha prolungà sia carriera da president che cuzza gia pli che dus decennis (cun il presidi da Mon). Uss dat el però vinavant la batgetta.
Cuira
Il suveran da la citad da Cuira ha da decider davart ina midada da la lescha da polizia. Concret vai per scumandar fieus artifizials sin il territori da la citad a chaschun da festas sco Silvester u la festa naziunala. Quest scumond haja la finamira da proteger meglier la populaziun, animals e l'ambient. Sch'il suveran accepta la midada vegniss fieu artifizial che fa canera scumandà, quel che fa pauca canera (sco vulcans) resta vinavant lubì. Organisaturs d'occurrenzas pon dumandar lubientschas, persunas privatas però betg.
Tavau
A Tavau è l'infrastructura da la loipa da notg vegnida veglia. Perquai decida il suveran davart in credit d'impegn da 6,52 milliuns francs per sanar l'implant tecnic per illuminar ed ennavar la loipa da notg en il territori da Duchli/Mattastrasse a Tavau.
Domat
A Domat vegn danovamain a l'urna la revisiun parziala da la planisaziun locala per nizzegiar meglier quartiers existents e stgaffir dapli spazi d'abitar. Avant in onn aveva la revisiun fatg naufragi, uss han ils responsabels elavurà ina fatschenta pli pauc cumplexa. Il svilup dal quartier Tircal sco era la mobilisaziun dal terren da bajegiar sajan vegnids reducids.
Ilanz/Glion
Per cumplettar il parlament communal e chattar in successur u ina successura per Christian Caduff ch'ha demissiunà, dovri a Glion ina elecziun cumplementara. Per il sez liber candideschan Tim Bürkli da la Partida liberaldemocratica e Jaromir Kreiliger, ch'è senza partida. Il nov commember dal parlament cumenza ses uffizi il prim da fanadur.
Lumnezia
En il rom dal «Masterplan Enturn il Mundaun» investeschan las vischnancas Lumnezia e Sursaissa sco er las pendicularas Sursaissa Mundaun en l'infrastructura turistica en il territori da skis. A sias radunanzas communalas han mintgamai Lumnezia sco er Sursaissa gia dà glisch verda ad in credit da 3,9 milliuns francs chapital agen ed ina garanzia da 7,5 milliuns per finanziaziuns tras bancas. La fatschenta vegn uss anc a l'urna.
Medel/Lucmagn
Duas novas commembras u commembers da la suprastanza communala ha il suveran da la vischnanca da Medel/Lucmagn d'eleger. A disposiziun stattan Ciril Lutz da Matergia e Marina Morgenthaler da Curaglia.
Tujetsch
A Tujetsch vai per cumplettar la suprastanza communala. En in emprim scrutini ch'è stà il matg n'eri betg reussì d'occupar tut ils posts. Per il post vacant stat a disposiziun cun Pascal Berther ina candidata uffiziala, quai ha la vischnanca da Tujetsch confermà sin dumonda da RTR.
San Murezzan
A San Murezzan vai per l'elecziun d'in nov president u ina nova presidenta communala. Annunzià candidaturas han Isabel Wenger, Sebastian Bahner ed Adriano Iseppi. Il suveran ha pia la schelta tranter trais candidaturas, ina dad ellas succeda a Christian Jott Jenny ch'ha demissiunà.
Sper l'elecziun d'ina nova presidenta u in nov president decida il suveran da San Murezzan davart l'emprima etappa dal project da revitalisar la riva dal Lai da San Murezzan. Il project cun il num «Riva Viva» vul d'ina vart augmentar la valur turistica al lai ma er renaturalisar spazi da viver per animals. Il project ha en tut otg etappas, per mintgina ha il suveran pled en chapitel, sche tuttas vegnan acceptadas custa il project 13 milliuns francs, la realisaziun cuzza enfin il pli tard il 2031.
Tusaun
A Tusaun duai l'ovra electrica Rheinau vegnir remplazzada cun in nov implant, cunquai che l'existent na correspundia betg pli a las pretensiuns tecnicas d'ozendi, scriva la vischnanca. Per ch'ins po insumma far la nova construcziun sto il suveran reveder la planisaziun d'utilisaziun da l'ovra Rheinau.
Trimmis
Davart in credit d'impegn da 3,5 milliuns francs decidan las votantas ed ils votants da Trimmis. Cun quests daners èsi planisà da construir ina nova scolina dubla sco er engrondir las localitads existentas.
Val
Val adattescha sia planisaziun locala a la lescha surordinada. Elements centrals da la fatschenta che vegn a l'urna èn la reducziun da zonas da construir surdimensiunadas, da promover il svilup d'abitadis a l'interiur sco er definir cundiziuns cleras pertutgant bajegiar, abitar, industria e turissem.
Vaz
Las votantas ed ils votants da Vaz han da decider davart duas fatschentas che stattan en connex cun il spazi d'abitar. Per far frunt a la mancanza vulan la vischnanca politica e la vischnanca burgaisa da Vaz fundar ina fundaziun per promover spazi d'emprimas abitaziuns. La fundaziun duai avair sia atgna furma giuridica e vegnir controllada da la vischnanca burgaisa e la vischnanca politica.
Er en connex cun la fundaziun vulan la vischnanca burgaisa e la vischnanca politica mintgamai deditgar a la fundaziun ina parcella terren. Uschia possia la fundaziun vegnir installada e cumenzar sia activitad operativa. Concret vai per ina parcella a Valbella (vischnanca politica) ed ina parcella a Zorten (vischnanca burgaisa).
Zizers
Sin basa d'ina petiziun or da la populaziun da Zizers vul la vischnanca introducir in scumond da fieus artifizials. Il scumond pertutga fieus artifizials che fan canera da festas sco Silvester e la festa naziunala. Il suveran decida a l'urna sch'el vul far ina fin a rachetas al firmament.