Manuela Gebert, ch’è advocata, viva dapi l’onn 2019 ad Alvagni Bogn e sa sentia fitg bainvegnida en il vitg ed en la val, ha ella tradì envers RTR. Sia motivaziun per la candidatura saja il giavisch da s’engaschar e da betg spetgar ch’insatgi auter surpiglia las incumbensas. Malgrà ch’ella n’ha nagina experientscha politica directa, ha ella – grazia a sia activitad professiunala sco advocata – blera experientscha cun la politica e cun temas politics.
Sia chanzlia d'advocatura a Berna ch’ella maina dapi l’onn 2019, mettess ella sin «flomma da spargn», per pudair dumagnar l’uffizi dal presidi communal.
Ella discurra gia in pau rumantsch
La lingua rumantscha haja ina gronda muntada per ella. Schebain ch’ella possia discurrer actualmain mo paucas frasas, chapeschia ella bain inqual chaussa, er sin fundament da sias enconuschientschas dal talian. Ses um è da lingua materna rumantscha, quai la gidia d’emprender. Ella è gia s’annunziada tar la Lia Rumantscha per lecziuns privatas per acquistar in minimum d’enconuschientschas dal rumantsch e per pudair inscuntrar la glieud da la val en sia lingua materna. Gebert exprima respect envers la sfida da l’uffizi presidial, ma nagina tema. Ella è conscienta ch’ella po far quint cun in team existent e cun blera experientscha. Actualmain è ella l’unica candidata per il presidi. L’elecziun è ils 14 da zercladur a l’urna.
Atgnamain vuleva Daniel Albertin gia dar giu ses uffizi cun la fin 2024. Cunquai ch'i n'è lura però betg gartegià da chattar ina successiun, ha el decis il november da tuttina anc restar president communal fin ch'insatgi è pront da surpigliar l'uffizi.
Duas demissiuns en suprastanza
Da la suprastanza communala actuala han inoltrà la demissiun Agnes Simeon e Martin Christen. Patrizia Zanini ha gia decidì ch’ella veglia candidar per in’ulteriura perioda d’uffizi.
Ils auters en suprastanza n'han betg anc decidì. Sco nov candidat per la suprastanza sa metta a disposiziun Roman Brenn, ch’è stà il davos president communal da Stierva avant la fusiun. L'elecziun da la suprastanza communala è quest atun.