Bregaglia
L'interpresa Cuorta Bau GmbH da Schlarigna vul utilisar l'aua da l'aual Carpeia a Bregaglia per la chava da crappa «Nasiè-Cludan». Per survegnir la permissiun da construir la chava da crappa dovra ella pia anc la concessiun d'aua. Davart quella votescha la populaziun da Bregaglia ils 18 da matg.
La radunanza communala, ch'ha gia votà en chaussa ils 20 da mars, recumonda cun gronda maioritad ad ils votants e las votantas d'approvar la concessiun.
Churwalden
La vischnanca da Churwalden votescha davart la revisiun totala da lur constituziun communala. La constituziun actuala è anc da l'onn 2009, cura che Churwalden ha fusiunà cun Malix e Parpan. La revisiun totala vul modernisar questa constituziun per pudair optimar l'organisaziun da la vischnanca. Qua ina survista da las midadas centralas:
- La suprastanza communala duai da nov be pli consister da 5 enstagl da 7 commembers
- Abolir ils circuls electorals da las vischnancas anteriuras
- Reglar cleramain co decisiuns vegnan fatgas en ils gremis da la vischnanca
- Adattar ils motivs d'exclusiun e d'incumpatibilitad
- Unifitgar il modus da votaziun en la radunanza communala
Dus terzs dals votants e las votantas da Churwalden ston approvar questa revisiun totala ils 18 da matg per ch'ella po ir en vigur. La radunanza communala recumonda d'approvar quella.
Claustra
A Claustra è ina nova constituziun communala ida en vigur l'emprim da schaner 2025. Ussa ha la populaziun da votar davart duas novas leschas en connex cun quella:
- L'emprima lescha duai reglar l'organisaziun ed ils pensums da las autoritads communalas e da l'administraziun communala. Tranter auter duai il pensum da lavur dal president communal vegnir auzà da nov sin 80% fin 100%. Ed er la paja dal president communal duai crescher per ch'ins chattia meglier candidatas e candidats qualifitgads.
- La segunda lescha vul concretisar ils dretgs politics dals burgais e las burgaisas (votaziuns, elecziuns, iniziativas, referendums, relaschadas d'uffizi). Per quest intent duai la lescha existenta vegnir simplifitgada ed adattada al dretg chantunal.
Domat/Ems
La vischnanca da Domat vul surlavurar la planisaziun locala per pudair porscher dapli spazi da viver. Enstagl da crear novas zonas d'abitar vul Domat dentant nizzegiar meglier ils quartiers existents. Era per manaschis vul la vischnanca daventar pli attractiva. Perquai duai per l'ina vegnir creada ina nova zona d'industria en il Vial e per l'autra vegnir engrondida la zona d'industria existenta Paleu Sura. Per realisar quests projects sto la vischnanca adattar e far pli flexibla la lescha da construcziun.
Il Cussegl communal ha gia approvà la revisiun parziala, il davos pled en chaussa han ils votants e las votantas da Domat.
Favugn
Ils abitants e las abitantas da Favugn han da votar ils 18 da matg davart il quint annual dal 2024. Quel ha serrà nunspetgadamain cun in surpli da 27'339,85 francs, schegea che la vischnanca aveva quintà cun dapli expensas che gudogn.
Grono
Suenter che la vischnanca da Grono ha stuì sbittar il project da construir in center da sport regiunal a Leggia, aveva il cussegl communal incumbensà l'executiva da tschertgar in'alternativa per pudair construir in bogn avert. In biro d'architectura ha sinaquai creà in plan per il project: Il bogn da bun 25 meters lunghezza duai vegnir construì sin l'areal da la plazza da ballape existenta. Per realisar quel sto la populaziun da Grono uss approvar l'investiziun da 4,95 milliuns francs. Il Cussegl communal ha gia approvà unanimamain il project.
Ilanz/Glion
La populaziun da Glion elegia ils represchentants da la suprastanza communala e dal parlament sco era il u la presidenta communala per la perioda dal 2026 fin il 2029. En il parlament vegnan otg sezs libers. Per il presidi na datti fin uss anc nagina cuntracandidatura al president actual, Marcus Beer.
Puntraschigna
Samedan e Puntraschigna decidan ils 18 da matg davart la dumonda sche l'ospital Engiadin'Ota duai vegnir integrà en l'Ospital chantunal a Cuira.
Plinavant sto il suveran decider sch'i vulan acceptar il credit da project da 9 milliuns francs per la sanaziun e l'engrondiment da la chasa da scola suot. La chasa da scola è vegnida bajegiada avant radund 125 onns e la davosa sanaziun da l'intern è stada avant passa 60 onns. Oravant tut ils tetgs e las lingias ston vegnir sanadas ed i duai dar ina optimaziun energetica dal bajetg.
Samedan
Tuttas vischnancas da l'Engiadin'Ota han actualmain da prender ina decisiun areguard la dumonda: duai l'ospital Engiadin'Ota vegnir integrà en l'Ospital chantunal a Cuira? Ils 18 da matg votescha pia era la populaziun da Samedan en chaussa. Tenor il Provediment da sanadad Engiadin'Ota saja questa integraziun necessaria per segirar ils servetschs medicinals da basa a Samedan. La suprastanza communala recumonda da sustegnair l'integraziun, il davos pled han dentant ils votants e las votantas da Samedan.
Scuol
A Scuol vegn decis davart ina lescha per la megliuraziun d'Ardez e Guarda. Quella è necessaria perquai che la radunanza communala ha decis avant in onn da realisar la megliuraziun da las fracziuns Ardez e Guarda.
Plinavant vegn votà davart ina revisiun parziala da la lescha per il diever da las vias champestras e las vias da guaud cun vehichels a motor ed i dat ina elecziun substitutiva per la cumissiun sindicatorica.
Surses
Encunter il credit d'impegn da 1,45 milliuns francs per la via da bike e da viandar «Juliertrail» è vegnì fatg in referendum. Perquai so il suveran confermar quel a l'urna, era sche la radunanza communala ha gia il december 2024 approvà el.
Vaz/Obervaz
A Lai sto il lai da fermada «Heidsee» vegnir sanà, perquai che tant il lai sura sco il lai sut na correspundan betg pli a las pretensiuns da segirtad pertutgant auas grondas e terra trembels. Senza midadas na lubescha l'Uffizi federal per energia il manaschi be fin la fin dal 2027. La sanaziun custa radund 9,7 milliuns francs e sto perquai vegnir approvada dal pievel.
Zezras
I vegn votà davart duas revisiuns parzialas da leschas. Per l'ina la revisiun da la lescha davart il provediment d'aua. Per l'autra davart la revisiun da la lescha davart l'allontanament d'auas persas.
Plinavant vegn elegì il president u presidenta communala per la perioda d'uffizi 2026-2028. A disposiziun stat il president actual, Daniel Freud, ed ils dus candidats novs Florin Castelberg e Georges Clement.