Il Cussegl turistic dal Grischun vul dar ulteriurs impuls a l'economia da turissem. Quai surtut en vista a la mancanza da persunal qualifitgà e bain scolà. Il gremi che cusseglia la regenza grischuna quinta numnadamain, che la problematica s’accentuescha ils proxims onns che la glieud bain scolada manca en il turissem. Quai mussian era dus studis da las universitads da Son Gagl e da Berna.
Il Cussegl turistic dal Grischun ha envidà uniuns professiunalas dal Grischun e scolas – per discutar ils dus studis ed avair endament pussaivlas vias per concretisar las mesiras menziunadas. Ils proxims mais duain las ideas vegnir evaluadas e concretisadas. I va surtut per augmentar l'attractivitad dal Grischun sco lieu da lavur.
Trends sco «FlexLodge» e «Workation»
Autras tematicas che fatschentan actualmain il Cussegl turistic dal Grischun èn furmas da star sur notg temporaras, u mez staziunarias. Questas novas furmas correspundian ad in basegn actual, scriva il gremi. La Scola auta spezialisada dal Grischun sclereschia il mument sco il svilup pudess vesair or en il futur – quai era cun dumandar purschiders da talas furmas da star sur notg.
Sut il titel «Workation» vai per sclerir, co il Grischun pudess profitar dal lavurar pli mobil. Ils resultats da questas duas retschertgas vul il Cussegl turistic dal Grischun preschentar la primavaira 2022.
