En il Grischun datti actualmain 645 novs cas da corona confermads entaifer 24 uras. Quai è ina da las cifras las pli autas dapi l'entschatta da la pandemia dal coronavirus. Venderdi aveva annunzià il Grischun 576 novas infecziuns ed il di avant 637. Persuenter n'èn mortas naginas ulteriuras persunas en connex cun Covid-19 entaifer las ultimas 24 uras, scriva il chantun sin sia pagina d'internet.
En isolaziun èn actualmain dapli che 3'402 persunas; ed en quarantina sa chattan 1'844 persunas en il Grischun. En tut vegnan 37 persunas tgiradas en l'ospital, da quellas 8 sin la staziun intensiva.
Quota da positivitad crescha
En egl dat era la quota da positivitad tar ils tests. Questa crescha dapi mez december puspè ed va ussa vers la cifra pli auta dapi la pandemia. Actualmain resulta radund mintga quart test positiv (23,4%). Pli auta era questa quota mo durant la segunda unda cun 27,4% (4-11-2020).
L'Uffizi federal da sanadad BAG n'annunzia naginas cifras da corona per la Svizra la fin d'emna.
