La situaziun saja bain preoccupanta ed il svilup malguess per ils proxims dis, communitgescha il Cussegl federal suenter in'ulteriura sesida da venderdi. Ins stoppia bain quintar che las cifras creschian vinavant cun la varianta omicron che prevala entant era en Svizra. Da l'autra vart na saja però anc betg cler, quantas persunas che stoppian la finala vegnir tgiradas sin la staziun intensiva. Era betg cler saja anc l'effect da las mesiras ch'èn idas en vigur ils 17 da december. Per questas raschuns desista il cussegl federal dad ulteriuras mesiras.
Pachet da mesiras preparà – cun lockdown almain parzial
Sco quai ch'il cusseglier federal Alain Berset aveva gia annunzià via Twitter ils ultims dis, punctuescha il cussegl federal però ch'in pachet dad ulteriuras mesiras saja gia sin maisa. Uschia possia il cussegl federal agir spert, sche la situaziun avess da midar negativamain. Per exempel sch'i dettia ulteriuras infurmaziuns preoccupantas davart la varianta omicron, u sche la situaziun en ils ospitals avessia da pegiurar marcantamain. Quest pachet cumpiglia tranter auter da serrar firmas ed instituziuns. Quai però mo, sch'i saja inevitabel.
Appell da vaccinar, dar booster e respectar las reglas
In'ulteriura giada appellescha il cussegl federal als chantuns da dar gas cun vaccinar e dar la terza dosa (booster), per proteger usche bleras persunas sco pussaivel d'in decurs malign da la malsogna. Vers la populaziun appellescha il cussegl federal da reducir contacts, avair la mascrina, da respectar las reglas d'igiena e da dar aria a las stanzas regularmain.
