A Hamburg ha il Moosburger TSV pers il gieu da bal cunter il SVS Mesopotamien 2 cun 0:66. Ed er sch'els n'avevan nagina schanza n'han ils da Moosburg betg dà si ed uschia evità ch'els fissan vegnids disqualifitgads da la liga.
Ma co è quai pussaivel da perder 0:66 en in gieu da bal? Ils da Moosburg eran be en set sin il plaz (sis umens ed ina dunna) ed il trenader ha sez era stuì giugar. Ma dar si il gieu avess muntà da vegnir disqualifitgads da la liga. Ed uschia han els cumbattì fin la fin e segirà il plaz en la liga.
L'essenzial da la questa buna nova ha il trenader resumà suandantamain: Tgi che guardia qua be sin cifras, manchentia l'essenzial. Els sajan ids en il cumbat n'hajan betg dà si, betg fatg fouls, betg laschà ora frust, simplamain dà ballape e quai na sa chapeschia en quella situaziun betg da sa sez. Exact en questas situaziuns sa mussia il vair caracter d'ina equipa.
Gia in zic moviment mintga di gida
Scienziads han fatg in studi e cumprovà che gia in pèr minutas moviment al di procuran per miraculs, surtut tar persunas ch'èn uschiglio plitost en il modus da canapé. Schont duas giadas al di 5 minutas, 5 minutas pliras giadas l'emna bastan per augmentar la fitness ed era per meglierar la circulaziun dal cor.
Tut quai è vegnì publitgà en il British Medical Journal – pia nagut d'in guru da fitness, mabain confermà scientificamain. Ed il meglier: Passa 80% dals participants e da las participantas dal studi han tegnì tras l'experiment, n'han pia betg dà si.
Perquai, empè da la tschigulatta u chips, pli gugent dus snacks da moviment al di. Tuttina sche Vus giais si da stgala, giais en schanuglias, faschais Tai Chi. Simplamain moviment, igl è en mintga cas il pli saun snack dal di, fa bain e cun garanzia senza calorias.
Maiavilla: la terz meglra vischnanca svizra 2025
Maiavilla ha dumagnà sin plazza trais en il ranking da vischnancas svizras dal magazin d’economia «Bilanz». Il magazin fa mintg’onn ina parada da hits dals lieus svizzers cun la pli auta qualitad da viver ma er cun quels cun la pli bassa qualitad da viver. Quest ranking vegn fatg a maun da 56 criteris, per exempel l’autezza da las impostas, pretschs da chasas, la segirezza, il lieu da la vischnanca, las scolas u era occasiuns.
Quest onn ha Maiavilla pudì persvader ed ha dumagnà en ils top trais. Pli bel saja quai be en il chantun Sviz a Freienbach ed ad Altendorf che fan plazza in e dus en il ranking. Freienbach ha battì Maiavilla sulet cun las impostas bassas e cun il lieu da la vischnanca direct al lai. Latiers è Freienbach datiers da Turitg.
«La buna nova» pudais Vus tadlar mintga glindesdi a las 6:50 sin Radio RTR .
