Siglir tar il cuntegn

Header

video
Maik Bisquolm da Sumvitg raquinta
Or da Telesguard dals 29.09.2021.
laschar ir
cuntegn

Maik Bisquolm raquinta «Discurrer sur da mobing po gia gidar bler»

Quasi l'entir temp da scola è Maik Bisquolm stà unfrenda da mobing. Cumenzà haja cun pitschnas chaussas sco plaids e spruhs. A la fin saja adina vegnì pli nausch.

Fin oz datti muments, nua che Maik Bisquolm sto esser tut sulet, sa retrair e tadlar musica. En quels muments emprovia el da lavurar si ils maletgs che cumparian, di l'um da 24 onns. Adina per maun ha el ses cudesch da notizias, nua ch'el ha avant trais onns cumenzà a scriver sias emoziuns, ses patratgs, quai ch'el senta e vesa. I dettia era muments nua che tuttas emoziuns vegnan en ina giada ed el survegn attatgas da panica. Tuttina resta el positiv.

Cumenzà haja cun chaussas pitschnas sco pleds e spruhs. Cun il temp èsi adina vegnì mender, sco ina stgala che va viasi.
Autur: Maik Bisquolm pertutgà da mobing

Mitschar da la situaziun

Insacura ha il giuven empruvà da discurrer cun la persuna d'instrucziun davart sia situaziun. Quella n'haja betg prendì serius el. Dar la culpa als scolasts na veglia el betg, accentuescha Maik Bisquolm. Per gronda part saja el vegnì tentà e mulestà en situaziuns senza ina persuna d'instrucziun, sco per exempel en il bus. Grond agid ha el chatta tar ina lavurera sociala. Ad ella haja el pudì dir tut, quai haja gidà fitg.

audio
Mobing en scola: il pertutgà Maik Bisquolm raquinta
03:56 min, Actualitad dals 30.09.2021.
laschar ir. Durada: 03:56 minutas.

Ensemen cun la lavurera sociala ha Maik Bisquolm mes sin pais ses agen project che sa numna «Stopp Mobbing!». El prenda era part a podiums tar quella tematica. Las reacziuns sajan fitg positivas. El ha grond plaschair ch'el po oz gidar ad auters.

Tgi ch'è pertutgà da mobing: Ir per agid, i na chala betg da sulet. Discurrer cun insatgi po schon gidar bler.
Autur: Maik Bisquolm pertutgà da mobing

RTR actualitad 06:00

Artitgels legids il pli savens

Scrollar a sanestra Scrollar a dretga