Ils dis daventan pli lungs e cun il sulegl che splendura tras las fanestras vesan ins la pulvra e la merda che na disturbava betg durant l’enviern. Che la veglia da far urden crescha ussa n'è betg ina surpraisa. La veglia vegn grazia a divers hormons ch'il corp producescha. Ils hormons serotonin e dopamin èn responsabels per la buna luna ed il basegn d’esser pli activs.
Cun far urden en casa survegn ins ina meglra survista sur da l’abitaziun e cun avair dapli urden e plaz han ins psicologicamain il sentiment ch'ins ha era dapli plaz per respirar e sa sentir bain. Tiers vegn era activà il center da recumpensa en il tscharvè suenter ch’ins ha nettegià e fatg urden.
Tgi che ha fadia cun far urden e bittar davent rauba sa ir per agid tar persunas che bittan davent senza grondas retegnientschas. Era in di fix en il chalender po esser in agid per far la nettegiada da primavaira.
E sch’ins ha l’intent da far la nettegiada da primavaira alura datti intgins tips:
- Far urden e assortir
- Nettegiar ensemen per sa motivar
- Tadlar buna musica
Igl è da far in bun plan, entschaiver là nua ch'igl è blera lavur e betg vulair far damemia.
Adina daplirs engaschan persunal da nettegiar
Laschar nettegiar insatgi las atgnas quatter paraids – per blers anc adina ina chaussa ch'els na pon betg s'imaginar. Tuttina datti adina daplirs che na lessan betg investir lur temps liber per nettegiar las fanestras, lavar il bogn u far tschitschapulvra. La dumonda suenter persunal da nettegiar saja creschida ferm ils davos 5-10 onns, di Claudia Hablützel da la Cumissiun paritetica per la branscha da nettegiar en la Svizra tudestga. L'onn 2012 haja dà var 2'000 interpresas da nettegiar. Oz, 10 onns pli tard il dubel: Var 4'000 interpresas.
Era l'image da la branscha saja sa meglierà. Dad ina vart perquai che las pajas sajan creschidas cuntinuadamain pervia dal contract da lavur collectiv e da l'autra vart era tras la pandemia da corona. Perquai che l'igiena saja stada uschè impurtanta, saja la branscha da nettegiar vegnida pli relevanta, di Claudia Hablützer.
Differentas interpresas resentan il svilup
Era las interpresas da nettegiar cun clientas e clients grischuns sentan ch'i è vegnì pli acceptà d'engaschar persunal da nettegiar. Uschia era l'interpresa da nettegiar R. Cathomas da Domat e la Senteler GmbH da Cazas.
Nus avain sentì ch'um e dunna lavuran dapli e han uschia pli pauc temp per nettegiar. Nus sminain che quai vegn era a restar uschia en il futur.
La crisa da corona haja la branscha da schubergiar en general surmuntà bain, di Claudia Hablützel dalla Cusmissiun partitetica. Ed ella smina che la dumonda suenter persunal da nettegiar vegnia era en il futur ad esser gronda.
