Cun «KLAPP» han ils geniturs tuttas infurmaziuns ed ils termins da scola en in lieu e quai era sch'els han plirs uffants. Termins, messadis e documents sco per exempel infurmaziuns tar occurrenzas en scola vegnan communitgadas a moda digitala. L'app ha er ina funcziun d'absenza ch'infurmescha cun in clic tuttas persunas pertutgadas sch'in uffant manca. Cun la schliaziun digitala, han ils geniturs dapertut access a las infurmaziuns. Ins po duvrar l'app sin il telefonin, far il login sur il computer ubain abunar las infurmaziuns cun posta electronica. I na dat betg pli ina massa cedels e differentas vias da communitgar.
Differentas funcziuns
Dasper scriver messadis e parter documents, ha l'app er ina funcziun da chalender. Ins po far fotografias e videos sin «KLAPP». Er discurs virtuals èn pussaivels cun la funcziun da video. Cun la funcziun d'absenzas pon ils geniturs infurmar tuttas persunas pertutgadas cun in click sche lur uffant è malsaun. Per il mument datti l'app per englais, franzos, talian e tudestg.
Resultà dal mintgadi
Reto Kaspar, in dals dus fundaturs era vegnì memia tard a la saira da geniturs da ses figl, perquai ch'el na saveva betg exact en tge stanza da scola ch'el stoppia ir. Sin las infurmaziuns dal cedel vi da la frastgera a chasa n'aveva el nagin access. El ha pensà che quai duess ir pli simpel ed uschia era l'idea naschida. Ensemen cun ses quinà Elias Schibli ch'è er bab da trais uffants, ha el stgaffì il nov instrument da communicaziun.