Il giavisch da Pro Velo è clar: In'infrastructura da velo a Cuira per che tuts e tuttas possian ir segiramain e cun plaschair cun velo. Simon Gredig, il mainafatschenta ch'è medemamain en la gruppa da mesiras da velos da Cuira, pretenda tranter auter tempo 30 en l'entira citad e vias da velos ch'ins po ir en dus in sper l'auter.
Tuts ston vegnir resguardads
Il pli impurtant per Sandra Maissen, responsabla per il departament da construcziun, planisaziun ed ambient tar la citad da Cuira è che tut ils meds da traffic vegnan resguardads. Il velo saja in impurtanta part dal traffic sin via ma ins stoppia era mirar da las pedunas e peduns (cunzunt era quels cun impediments), traffic public ed ils autos.
Las velocipedistas ed ils velocipedists na vegnan betg resguardads avunda ed i dat anc bler potenzial – cunzunt sch'ins cumpareglia cun citads da velo tipicas sco Berna u Amsterdam.
La citad da Cuira ha cun il program d'aglomeraziun planisà ina secunda via da velo, parallela tar la «Ringstrasse», plinavant duai cul temps vegnir fatg ina ruta da confort davent da la citad veglia enfin a Cuira vest. La staziun dal «City West» duai daventar in'impurtant lieu. Davent da là vegnan uschenumnadas «colliaziuns spertas» construidas e quai suenter ils binaris. Sche tut funcziuna pon quels projects vegnì realisads davent da l'onn 2024.
«Critical Mass»
Questa saira datti in'acziun da velos a Cuira cul num «Critical Mass». I duai dar uschè ina gronda massa (ina massa critica) da velocipedists e velocipedistas ch'ella dat en egl. Cun quai vegn fatg attents ch'ils velos èn era in'impurtanta part dal traffic sin via - era sch'els vegnan forsa mintgatant emblidads.