In vitg cun pauc traffic saja il giavisch per il futur, di Reto Löpfe. Il president communal da Razén fiss cuntent sche la via tras il vitg restass era serrada sur las festas da Ascensiun e Tschuncaisma. Era intginas abitantas ed abitants pon s'imaginar quai.
Pussibel era en il futur?
Sch'i saja pussibel la schlargiar quest'acziun sin plirs dis, e sch'era auters vitgs enturn la A13 possian far uschè in project da pilot – gliez na possian ins enfin ussa betg dir, manegia il schef da la Polizia da traffic Robert Willi.
Polizia ha stuì intervegnir
En general ha la Polizia chantunala gì dapli lavur che spetgà. Las tavlas da signalisaziun ch'èn vegnidas montadas per far attentas las automobilistas ed ils automobilists che la via tras Razén e Panaduz é serrada – n'èn betg adina vegnidas resguardadas tuttina bain. Da fertant ch'i ha funcziunà la gievgia e da venderdi sontg, èsi cunzunt stà problematic il glindesdi cura ch'ils automobilists eran sin via a chasa en direcziun nord:
Nus avain stuì clamar persunal da la polizia per pudair intervegnir e controllar il traffic tar l'extrada Giuvaulta en direcziun Razén.
Quai na saja dentant nagin motiv, per desister da cuntinuar cun las mesiras da reglar il traffic, di il president da Razén Reto Löpfe. Las vischnancas da Razén e Panaduz evalueschan ils resultats ensemen cun ils represchentants da la maisa radunda. Per blers abitants ed abitantas èn ils dis da Pasca cun pauc traffic stads in levgiament. Uschia han els pudì traversar la via senza problems u giugar cun ils uffants dasper via.
