Tenor Marco Frey, schef tar la cultivaziun da puma dal Plantahof, saja era la racolta da paira e primblas massiv pli pitschna ch'auters onns. La racolta da tschareschas saja tar 75% cumpareglià cun auters onns.
Buna racolta da maila
Per ils mailers saja l'aura bletscha stada positiva, uschia hajan las plantas adina gì avund'aua. Per fortuna saja il Grischun mitschà da malauras e granella il zercladur. La racolta da maila saja da buna quantitad e qualitad.
Vignas tendenza positiva
Per far bilantscha da la racolta da las vignas saja anc in zic memia baud, di Walter Fromm dal Plantahof. La racolta dal Riesling saja dentant normala quest onn. Era tar las ivas blauas giaja la tendenza en direcziun d'ina quantitad normala fin buna.
Bilantscha d'iert maschedada
Pervia da las temperaturas bassas hajan els gì in mais retard cun semnar, di Roman Kleis, schef d'iert da la praschun Realta. Products frestgs da racolta dal di sco per exempel salata n'haja per part simplamain betg dà. Aua haja gì avunda, per part mancava il sulegl. Sut il stritg saja el cuntent cun la bilantscha da quest onn.
