Siglir tar il cuntegn

Header

audio
L'iniziativa da tgira ord vista grischuna
Or da RTR Audio dals 28.11.2021.
abspielen. Laufzeit 3 minutas 53 Sekunden.
cuntegn

Renate Rutishauser «Pervi da corona è l'interess medial stà fitg grond»

video
L'iniziativa da tgira è approvada cun clera maioritad
Or da Telesguard dals 28.11.2021.
abspielen. Laufzeit 3 minutas 39 Sekunden.

L'iniziativa da tgira vegn approvada cun passa 60%. In dals pli clers Geas ch'i ha dà enfin uss tar iniziativas. Quest resultat plascha a Renate Rutishauser, la presidenta da l'uniun grischuna dal persunal da tgira, ch'è s'engaschada fermamain per l'iniziativa.

In zic vegnia probablamain er la pandemia ad avair gidà:

audio
Rutishauser: «Sche corona na fiss betg stà avessan betg pudì far uschè cler la situaziun»
aus RTR Audio vom 28.11.2021.
abspielen. Laufzeit 13 Sekunden.

Uss saja da realisar tut uschè svelt sco pussaivel. Uschia duai vegnir stgaffida sco emprem en tut ils chantuns la basa legala per cumenzar cun in'offensiva da scolaziun e furmaziun, sco quei che er la cuntraproposta dal Cussegl federal aveva proponì. Suenter duain lura ulteriurs puncts sco pajas e cundiziuns da lavur vegnir pigliadas a maun.

Intgins segns da dumonda

A Joseph Müller ch'è CEO dals servetschs psichiatrics dal Grischun, avess la cuntraproposta plaschì meglier. Ad el fan ils pli gronds quitads, ch'i duai dar in contract da lavur collectiv per l'entira Svizra. Avant hajan ins pudì reglar quai tenor chantuns. Uss na giaja quai betg pli.

purtret da Müller.
Legenda: Joseph Müller, CEO dals servetschs psichiatrics dal Grischun e commember da la suprastanza da la Federaziun naziunala d'ospitals H+. RTR, Gion Gieri Flepp

El spera ch'ins vegnia uss da surpigliar a moda svelta las propostas da la cuntraproposta che sajan bunas e lura elavurar en in segund pass ils ulteriurs puncts. Pertge da quai avessan pazientas e pazients il pli bler. En tge moda e maniera ch'ins veglia lura realisar il rest, qua n'haja el anc betg ideas concretas.

Uss duai ir svelt

L'Associaziun svizra da las tgirunzas e dals tgirunzs pretenda suenter il Gea, che las pretensiuns centralas vegnian tant pli svelt realisadas. Il parlament duai approvar tant pli svelt ils puncts che er la cunterproposta ha previs – l'offensiva da scolaziuns e furmaziun. L'associaziun pretenda dentant er ch'il Cussegl federal suttamettia entaifer in onn ina missiva al parlament.

Metter enturn las ideas da la cuntraproposta e far guttas cun chau

Avant la votaziun n'èran las opiniuns schizunt entaifer il sectur da sanadad betg uschè cleras sco il resultat da la votaziun. P. ex. en las chasas da tgira a Glion ed a Savognin. Omaduas manadras avevan bain ponderà ditg vi e nà ma la finala era ina sa decidida per l'iniziativa e l'autra per la cuntraproposta.

Reacziuns: Claudia Tomaschett e Sandra Luzio

Claudia Tomaschett, la manadra da la chasa da tgira e d'attempads a Glion smarveglia ch'igl ha dà gist tant sustegn per l'iniziativa, cunzunt che quella vegnia er anc da la vart sanestra. Ma ella è cuntenta cun il resultat. Ella era sa decidida per l'iniziativa perquai che quella saja pli cumplessiva. Ma er Sandra Luzio, la manadra da la tgira en la chasa d'attempads e vicedirectura dal Center da Sanadad Savognin, po viver bain cun l'iniziativa. Er sch'ella avess preferì la cuntraproposta cun la speronza che quella portia pli spert in levgiament.

La cuntraproposta è qua, las ideas èn qua, la lescha è gia fatga ... Jau na savess betg tge che tegness encunter da metter enturn quai. Quai fiss la chaschun da far svelt guttas cun chau.
Autur: Claudia Tomaschett manadra da la chasa da tgira e d'attempads a Glion

Omaduas manadras èn da l'avis ch'i saja uss da realisar en in emprim pass l'offensiva da scolaziun e furmaziun ord la cuntraproposta. Quai saja lavurà or e possia vegnir fatg svelt. Cundiziuns da lavur, dumber da persunal per pazient u cussadenta, pajas u er dumondas da finanziaziun dovrian ses temp per lavurar or.

audio
Gea a l'iniziativa da tgira: Las duas manadras da Glion e Savognin
aus Actualitad vom 29.11.2021.
abspielen. Laufzeit 3 minutas 52 Sekunden.

Dovra daners e pazienza

Sandra Luzio spera che las persunas dal fatg en la tgira hajan lura er la pazienza sche tschertas chaussas na vegnian betg realisadas uschè svelt sco quai ch'ellas avessan gugent. U er fin ch'ins s'accorschia ils meglieraments. Malgrà il Gea a l'iniziativa saja quai numnadamain in enorm pass ch'ins haja decidì da far. E Claudia Tomaschett agiunta ch'i na dettia segir betg in quint da nulla. Ma il cler Gea mussia era ch'ins saja pront d'investir insatge ed uschia saja ella optimistica ch'ins chattia bunas schliaziuns.

Jau sper che betg memia bleras tgirunzas e tgiruns èn dischillusiunadas sche quai na va betg uschè svelt. Quai è numnadamain in enorm pass ch'ins ha uss da far.
Autur: Sandra Luzio manadra da tgira e vicedirectura dal Center da sanadad Savognin

RTR novitads 17:00 / actualitad 07:00

Artitgels legids il pli savens

Scrollar a sanestra Scrollar a dretga