Cusseglier guvernativ Peter Peyer na vesa nagina schliaziun sperta per il traffic turistic, che sviescha tras ils vitgs a l'ur da l'autostrada A13 respectiv la via naziunala tras il Partenz. Quai ha el respundì en la sessiun actuala dal Cussegl grond.
Il problem cun ils autos che guntgeschian saja strusch da schliar senza la Confederaziun. I dovria ina schliaziun regiunala fin surregiunala. Mesiras localas spostian il problem simplamain en in auter lieu, ha Peyer manegià.
Acziuns da serrar via stà illegal
Il schaner ha la vischnanca da Schiers serrà sia via da transit tras il vitg. Quai ha ella fatg per evitar, ch'i dat colonnas da traffic da skis. Quella acziun saja stada illegala, crititgeschan Confederaziun e Polizia chantunala. Er la vischnanca da Zezras ha vulì serrar la via da transit. Ella n'ha dentant betg survegnì la lubientscha da la polizia.