- L'entschatta matg han avert en blers lieus svizzers ils bogns averts.
- En blers lieus cumenza la stagiun da bogn cun reglas pli severas cun scumonds da chasa fin a prescripziuns da sa vestgir.
- Per il cumenzament da la stagiun èn las temperaturas da l'aua dentant stadas anc fitg rinfrestgantas.
Las previsiuns da l'aura per l'entschatta da la nova stagiun da bogn èn stadas maschadadas: La sonda, ils 2 da matg, èsi stà bain pulit sulegliv cun 23 grads, suenter hai però dà temperaturas pli frestgas.
Tuttina ha cumenzà la stagiun da bogn en Svizra. Uschia er en blers lieus en il Grischun:
A Son Gagl han ils 2 da matg avert tut ils bogns averts da la citad. A Lucerna èn quai stads ils bogns da riva Lido e Tribschen. Tar il bogn da lai Horw han ins stuì spetgar fin Ascensiun.
L'entschatta matg èsi anc stà plitost fraid
A Basilea ha cumenzà la stagiun per ils bogns da St. Jakob e Bachgraben e per il bogn Eglisee.
A Berna èn averts ils bogns averts Lorraine, Wyler e Weyermannshaus. L'Aarebad Marzili a Berna vegn pervi da lavurs da sanaziun mess en funcziun pir a partir dals 23 da matg en etappas.
Per cumenzar saja en il Marzili mo pussaivel da nudar en l'Aara, ils novs batschigls d'aua suondian probablamain mez zercladur. La Ka-We-De resta pervia da sanaziun serrada fin l'atun 2026.
A Turitg han il bogn da lai Utoquai, il bogn avert a Seebach ed il bogn avert Letzigraben gia cumenzà cun lur manaschi mez avrigl e l'entschatta matg. Excepziuns èn il bogn per umens Schanzengraben ed il bogn avert Dolder che avran probablamain l'entschatta zercladur puspè suenter lavurs da sanaziun.
Er las citads da Cuira e Genevra èn partidas en la stagiun da bogn avert. A Losanna ha il bogn Bellerive avert tradiziunalmain pir ils 14 da matg.
En numerus auters chantuns è il cumenzament da la stagiun gia stà il prim da matg. Quai per la gronda part dals implants en ils chantuns Argovia, Schaffusa, Turgovia e Vallais.
Novas reglas a Basilea, Pruntrut e Genevra
Cun l'entschatta da la stagiun da bogn han intginas citads rinforzà lur prescripziuns. A Basilea po il persunal en cas da surpassaments da las reglas da nov pronunziar e surdar scumonds da chasa directamain al lieu, sco il departament d'educaziun ha annunzià mez avrigl. Fin uss è quai capità per posta.
Tut tenor la grevezza da la cuntravenziun po vegnir pronunziada suenter in'admoniziun in'expulsiun da 72 uras u in scumond da chasa da fin in onn. Il departament d'educaziun ha plinavant annunzià dapli persunal da segirezza durant dis cun bleras visitadas ed extendì scolaziuns da deescalaziun per il persunal.
A Pruntrut en il chantun Giura ha il parlament communal dà a la regenza da la citad la cumpetenza da relaschar novas restricziuns d'access per il bogn avert. Quai suenter problems la stad 2025, cura ch'ins ha refusà l'entrada a giasts da la Frantscha pervi d'in cumportament deplazzà. Il bogn duai avrir ils 23 da matg.
Il chantun Genevra ha stgaffì il mars ina nova basa legala per la vestgadira da bogn en bogns publics. Latiers èn mo pli lubids costums da bogn u chautschas da bogn che tanschan maximalmain fin sur ils schanugls e che na cuvran betg la bratscha. Questa regulaziun excluda facticamain da purtar in burkini.
In criteri decisiv èn actualmain bain las temperaturas da l'aua actualas: Il venderdi han «carmalà» il Rain a Basilea (15 grads), l'Aara a Berna (14,9 grads), il Lai da Turitg a Tiefenbrunnen (16,7 grads), il Lai da Constanza a Romanshorn (15 grads) u il Lai dals Quatter Chantuns a Hergiswil (14 grads) per nudar.
Dapli indicaziuns davart las temperaturas da l'aua porscha la pagina d'internet www.wiewarm.ch cun las valurs da mesiraziun da 220 bogns da flums, lais, bogns averts e bogns cuverts.