Comité cunter
Il comité cunter sa cumpona surtut da persunas or da partidas burgaisas (PPS, PLD, AdC). Tenor ellas saja l'iniziativa per ina 13avla renta «asociala e chara». Ina 13avla renta survegniss mintga persuna – e cun quai er bleras persunas che n'han betg basegn da quella.
Plinavant pegiurass la 13avla renta ils problems finanzials da l'AVS. Pajar ils custs supplementar da passa 5 milliardas francs l'onn stuessan a la fin ils patruns da lavur e quels che lavuran, sco er ils consuments e las consumentas sur la taglia da plivalur. Surtut famiglias giuvnas tutgass quai.
Il comité vuless dentant augmentar las rentas bassas. Plinavant fa el attent sin ina moziun ch'è vegnida approvada tar la davosa sessiun da december. Quella vul adattar la furmla da calculaziun da l'AVS e pigliar resguard sin entradas bassas.
Comité per
Lantschà l'iniziativa avevan sindicats, sco er persunas da la Partida socialdemocratica. Per ina 13avla renta da l'AVS pledescha tranter auter er l'organisaziun da persunas pensiunadas Avivo. Tenor quell'organisaziun profitassan surtut persunas pli pauc privilegiadas. Bleras persunas hajan basegn dad ina 13avla renta.
Temas davart la finanziaziun n'ha Avivo betg. Cun ina 13avla renta importass l'AVS l'onn 2030 anc adina 49 milliardas francs. L'AVS na giaja betg bancruta. In'ulteriura opziun per la finanziaziun vesa Avivio en las rendita dal chapital. Quels gudogns pudessan ins nizzegiar per finanziar l'AVS.
L’Associaziun Svizra per affars da seniors (SVS) na sustegnia dentant betg l'iniziativa. Tenor la SVS na possia betg esser che la generaziun giuvna stoppia puspè pajar dapli per las persunas attempadas.
