Siglir tar il cuntegn

Header

audio
Cussegl federal di Na a las iniziativas da rentas
Or da Actualitad dals 22.01.2024. Maletg: Keystone
laschar ir. Durada: 4 minutas 33 Secundas.
cuntegn

Votaziuns dals 3 da mars Cussegl federal refusa las duas iniziativas da rentas

Tant il Cussegl federal, sco er il parlament refusan las duas iniziativas da rentas. La ministra dals affars interns, Elisabeth Baume-Schneider, ha preschentà lur arguments. Davart las iniziativas vegn votà ils 3 da mars.

Iniziativa da rentas

L'iniziativa da rentas pretenda che la vegliadetgna da renta per umens e dunnas vegn augmentà pass per pass sin 66 onns fin l'onn 2033. A partir da lura duai la vegliadetgna vegnir adattada tenor l’aspectativa da vita. Emprimas calculaziuns quintan cun ina vegliadetgna da renta da 67 onns fin l'onn 2043.

Innenministerin Elisabeth Baume-Schneider
Legenda: L'iniziativa da rentas saja memia «steria», uschia Elisabeth Baume-Schneider, la ministra d'affars interns. Keystone

Tenor il Cussegl federal stoppian dentant vegnir resguardads dapli facturs che mo la vegliadetgna sch'i va per definir la vegliadetgna da rentas. Uschia stoppian ins per exempel er adattar la vegliadetgna sch'il pajais sa chatta en ina recessiun economica. L'iniziativa na lubeschia betg quai.

Plinavant saja deplazzà dad augmentar puspè la vegliadetgna. Tar la davosa refurma da l'AVS l'onn 2022 saja gia vegnì decidì d'augmentar la vegliadetgna da las dunnas sin 65 onns. Ulteriurs auzaments na duessan tenor il Cussegl federal betg vegnir fatgs isolads da quai.

Ils arguments per l'iniziativa

Avrir la box Serrar la box

Tenor il comité d'iniziativa saja l'AVS en ina sballantscha finanziala. Senza agir sajan las rentas en privel. Cun adattar la vegliadetgna da pensiun possian ins finanziar l'AVS senza stuair sbassar la renta ubain crear novas impostas.

L'iniziativa è vegnida lantschada dals Giuvens liberals svizzers.

Iniziativa per ina 13avla renta da l'AVS

L'iniziativa per ina 13avla renta da l'AVS pretenda precis quai che stat en ses num: ina 13avla renta. Uschia duai vegnir segirà meglier il minimum d'existenza suenter la pensiun. La dumonda da la finanziaziun lascha l'iniziativa avert.

Precis quel punct disturba dentant il Cussegl federal. Ina 13avla renta da l'AVS custass almain 4,1 milliardas francs dapli mintg'onn. La Confederaziun stuess surpigliar 800 milliuns francs. Quai pegiurass la situaziun finanziala actuala. Senza augmentar taglias ubain scursanir en auters lieus, na saja quai betg finanziabel. Plinavant survegnissan era persunas che n'han betg basegn da dapli daners la 13avla renta.

Arguments per l'iniziativa

Avrir la box Serrar la box

Ils iniziants han lantschà il cumbat da votaziun avant duas emnas. Tenor els creschan ils custs da viver adina vinavant. Ina 13avla renta gidia da garantir ina vita degna en la vegliadetgna. Cunzunt tgi ch’haja ina paja mediocra u bassa profiteschia.

L'iniziativa è vegnida lantschada da l'Uniun sindicala svizra ensemen cun la partida socialdemocratica ed organisaziuns per seniors.

Davart las iniziativas votescha il suveran ils 3 da mars.

audio
Per tadlar: Curt e cumpact
ord RTR Audio dals 22.01.2024.
laschar ir. Durada: 1 minuta 21 Secundas.

RTR novitads 12:00

Artitgels legids il pli savens