Per tge vai? Chatbots dad IA èn anc adina fitg malexacts da furnir ad umans il dretg cussegl medicinal. Quai mussa in nov studi da l'universitad dad Oxford ch'è cumparida en il magazin spezialisà «Nature». Be en in terz dals cas ha l'IA fatg la dretga diagnosa. Vegnidas testadas èn differentas intelligenzas artifizialas, tranter auter il model davos «ChatGPT» e l'IA dal concern da Facebook Meta.
Tge è vegnì testà? 1'300 persunas èn sa participadas a las emprovas. Als probands èn vegnidas dadas descripziuns realisticas da sintoms tar in tschert problem medicinal. Els duevan lura chattar cun la IA per pudair far la diagnosa e per sclerir ulteriurs pass pussaivels. Facit: mo en circa in terz dals cas ha la IA chattà la dretga diagnosa ed en mo 44% dals cas testads ha ella dà recumandaziuns d'agir correctas.
«Docter Google» u «docter ChatGPT»? Ina gruppa da controlla ha survegnì ils medems scenaris medicinals, dentant cun l'incumbensa da s'infurmar en furma classica en l'internet. Questa gruppa ha gì in resultat bler meglier che quella che la IA ha consultà – en dapli che la mesadad dals cas testads ha ella chattà diagnosas correctas. «Docter Google» para damai anc adina meglier che «docter ChatGPT».
Pertge na fa l'IA betg ina meglra figura? Models linguistics èn trenads cun bleras datas medicinalas. Gia dapi onns dumogna l'IA tscherts examens medicinals en scrit. Ma en il chat cun pazients ha ella bregias – quai mussa il studi actual. Ils perscrutaders attribueschan quai a problems da communicaziun. Savens laschan umans ora infurmaziuns impurtantas u s'expriman a moda nunprecisa. Qua dumandass ina buna media suenter.
Tge diagnosas falladas capitan? En in scenari testà èn vegnids communitgads als probands ils sintoms d'in culp dal tscharvè. Ina persuna ha scrit a l'IA ch'ella haja mal il chau extremamain ferm, tatona dira e sensibilitad a la glisch – ella ha emblidà da dir ch'il mal il chau saja capità tuttenina.
L'IA ha tippà sin in simpel mal il chau u sin ina migrena e cusseglià da sa tschentar en ina stanza stgira. Pir cura che l'IA ha survegnì l'infurmaziun ch'il mal il chau è vegnì tuttenina, ha ella vis ina sanganada dal tscharvè sco opziun ed ha cusseglià da tschertgar immediat agid. Pitschnas nianzas en la communicaziun èn damai decisivas.
Co po l'IA vegnir meglierada sco post da consultaziun medicinal? Las perscrutadras ed ils perscrutaders vegnan a la conclusiun che las IA stoppian meglierar la communicaziun e manar discurs sistematics da pazients a moda sumeglianta sco ina media u in medi.
Il studi mussa era: sche la IA ha tut las infurmaziuns, pia l'entir maletg da la malsogna, diagnostitgescha ella correctamain en 95% dals cas testads. En il studi rendan las perscrutadras ed ils perscrutaders attent al fatg che models futurs da IA per medischina stoppian vegnir testads l'emprim cun umans avant che vegnir en acziun. Ils models da linguas testads na sajan anc betg pronts per il contact cun ils pazients.