In orca mazza sia trenadra, Jessica Redcliff, durant ina show en in parc da divertiment. Ins vesa co l'animal tschappa la dunna e tira ella sut l'aua. Simplamain brutal. Il video para real, el è dentant cumplettamain inventà. Ni la trenadra, Jessica Redcliff, ni quel parc da divertiment existan. Il video è in «Deepfake» ch'è vegnì creà cun intelligenta artifiziala – e mussa quant privlusas che talas falsificaziuns pon insumma esser.
Qua sa dat la dumonda: Savain nus insumma anc crair quai che nus vesain sin social media? Tenor Guido Berger, redactur digital da SRF, saja quella dumonda schon daditg en retard e n'haja betg da far mo cun la buna qualitad dals videos mabain cunzunt cun la quantitad da quels videos, sco ch'el declera envers SRF.
Pudair tegnair la survista ed tschertgar las funtaunas tar tants videos e maletgs n'è betg pussibel. Ed era sche experts faschessan il check da funtaunas, fin che quel è fatg, curseschan gia milli novs videos atras las raits socialas.
Igl effect da quai è ch'era cuntegns corrects vegnian mess en dumonda. La dumonda sch'insatge è vair u betg è daventada cumplettamain irrelevanta.
Cumbatter AI cun agid dad AI
Vulair verifitgar quests «fake-videos» e purtrets cun agid dad intelligenza artifiziala – sco che las grondas plattafurmas lessan ussa far – na saja betg fitg persistent e na fetschia betg gronda speranza, manegia Guido Berger. Vinavant n'hajan quellas filigranas, era numnà «Wasserzeichen», betg in grond effect.
Influenza politica
Sper il fatg che bler cuntegn è sfalsifitgà, dependi era adina pli ferm da tgi ch’il cuntegn deriva insumma. Plattafurmas che raquintan teorias dubiusas dettia bleras, manegia il expert. Ina dumonda che vegn adina pli e pli impurtanta è: tge crai mia «bubble»? Pia mes zirchel. E quai crai jau lura era.
Cunzunt problematic vegnia, sche da quels «fake-videos» hajan lura ina influenza sin la politica – e qua sajan pajais cun ina democrazia represchentativa sco la Frantscha, ubain pajais cun in sistem politic da paucas partidas, sco per exempel ils Stadis Unids da l'America, pli periclitads che la Svizra. Tenor Guido Berger, redactur digital da SRF, haja la Svizra cun la democrazia directa ubain il federalissem tant enavant ina buna protecziun cunter da quels svilups.
Tge privels pon quels «fake-videos» avair – cunzunt per giuvenils?
Ina giada èsi legher ed in'autra giada èsi brutal, pia cuntegn ch'ins na vul betg exnum vesair. Tge ch'omadus stils da videos han communabel: crear emoziuns. E cun quellas emoziuns pon ins tschappar ils users e cunzunt ils giuvenils. E qua saja il crutsch, sco il pedagog da medias, Mirco Manetsch, declera.
Pli ditg che jau guard insatge e dapli infurmaziuns pon els rimnar da mai. La fin finala vai adina per optimar il cuntegn per che la glieud guarda e stat pli ditg sin las raits socialas.
Privels per giuvenils
L'intelligenza artifiziala, che generescha quels videos sfalsifitgads sin social media, saja in zic sco in guaffen cun il qual ins stoppia anc emprender dad ir enturn. U sco Mirco Manetsch di: «L'intelligenza artifiziala è sco in martè.» Cun lez pudain nus era crear fitg bellas chaussas, ma pudain era destruir enqual chaussa – e qua è il privel.
In privel fetschia spezialmain quitads ad el, numnadamain la radicalisaziun – saja quai ina radicalisaziun rassistica, religiusa ubain misogina.
Entaifer curt temp po in buob che n'ha betg ina buna structura a chasa vegnir radicalisà e crair che dunnas ston vegnir controlladas.
E quels buobs vegnian lura propi bumbardads cun cuntegn problematic en furma da «fake-videos» chaschunà da l'algoritmus, di il pedagog da medias Mirco Manetsch.
Responsabladad: Tgi porta quella?
Tenor Mirco Manetsch è il pli impurtant il dachasa dals giuvenils. Co ils geniturs vivan il consum da medias saja fitg central. Vinavant duessan ils geniturs era discurrer cun lur uffants e giuvenils davart ils cuntegns sin social media. Quai saja il pli impurtant.
Las scolas pon educar e metter in sem. Ma dar aua a quai sem, ston ils geniturs.
Cler che la tematica da social media ed intelligenza artifiziala e co ir enturn cun quels meds stoppia era vegnir tematisada e tractada en scola. E quai uschè baud sco mo pussaivel. Il meglier gia en scolina – qua stoppian nus dispit star vidlonder, di Mirco Manetsch.
Tip dal pedagog da medias per ils geniturs
La regla principala: guardar tge ch’il uffants ed il giuvenils fan. Impurtant è da betg vulair controllar els. Prender temps e discurrer ensemen cun els sur da quai ch’els vesan sin social media. Betg crititgar els. Simplamain restar en in dialog.
Duvrais in'idea per ina lecziun che tracta las medias? Vulais visitar RTR ed emprender co far videos u identifitgar «fake-news»? U duai RTR vegnir tar vus e far in'emissiun ord scola?
Sut rtr.ch/uffants/scola chattais Vus tut las infurmaziuns.