Umens e dunnas plitost giuvnas fan sur medias socialas reclama per in stil da viver saun e per in pensar positiv. Per exempel mussan ellas lur ensolver u sco ch’ellas fan sport. Tranteren vesan ins alura era co che las persunas sa participeschan ad in event da la marca ch’els represchentan. Lur finamira è lura da recrutar autras persunas ed uschia engrondir il rintg. Vitiers survegnan ils commembers e las commembras alura in bonus u ina provisiun. Sper quai vendan els products sco pulvras e supplements da nutriment.
In sistem illegal?
Quest concept da far reclama ed anc recrutar persunas po esser in marketing da nivels multipels, dentant possia quai er esser in sistem da lavina illegal. Ils suandants puncts èn impurtants per inditgar sch'il sistem è illegal:
- Il focus è da recrutar nova glieud, e betg da vender products.
- Participantas e participants survegnan ina provisiun sch’ellas recruteschan nova glieud.
- Persunas ston pajar a l’entschatta per vegnir en il sistem.
- Products che participants e participantas han cumprà e ch'els na pon betg vender vinavant, na pon ellas betg returnar.
- Las structuras dal sistem e la calculaziun da la provisiun n'èn betg transparentas.
Dentant n'èsi betg simpel da transferir quests puncts sin in affar e da vegnir tar ina conclusiun sch'igl è legal u betg. In exempel è l'affar PM-International ch'è registrà en il Zefix, l'index da firmas en Svizra. Quest affar venda products da cosmetica e supplements da nutriment. Ils commembers e las commembras publitgeschan surtut stories e posts da motivaziun, tranteren propagheschan els er ils products.
Reclamaziuns encunter fatschenta
Sco ch’il Secretari da stadi per l’economia Seco ha confermà datti trais reclamaziuns encunter PM-International, surtut da confamigliars da persunas involvidas. La fin finala stat la reproscha che l’affar saja in sistem da lavina en il center. Il SECO na po betg confermar sche quest affar fa lavur illegala, cun quai ch'i dat memia paucas reclamaziuns per ir davant dretgira.
Pon ins far il milliun en in marketing da multipels nivels?
Dapi in mez onn è l’Engiadinaisa Jennifer Scantlebury part dad in affar che fa reclama per ses products sur Instagram. Ella di che l’entschatta na vegn ins betg ritg cun far questa reclama.
Dentant na sajan ils daners betg sia motivaziun, la giuvna da 25 onns di da far quai damai ch’ella saja persvasa dals products.
Mes frar po rir da quai che jau fatsch, el fa sgnoccas che jau fatsch il milliun cun quest qua.
Ella è vegnida tar quest affar perquai ch’ella era en tschertga da products che megliereschan sia pel. Uss fa Jennifer Scantlebury stories nua ch’ella fa reclama per ils products. Ad ella plascha da far quests posts, là po ella esser creativa.
Jau hai segir 20 minutas per ina story che va 20 secundas.
Dapli ch’ella publitgescha, pli gronda che l’interacziun è. E sche Jennifer Scantlebury venda ad intgin in product, alura survegn ella ina provisiun. Quai èn raps ch’ella po metter da la vart, principialmain lavura ella sco magistra ed ella fa gugent sia lavur.
