Il Sananggahof a Grüsch vesa ora sco mintga auter bain puril. Sina Beck lavura ensemen cun ses geniturs sin il bain puril da 30 hectaras. Ma qua stat – sper l'agricultura – era social media en il focus. Sina Beck producescha videos per plattafurmas sco Tiktok, Youtube, Instagram e Facebook.
Il bain puril sa chatta sur la plazza da runals a Grüsch-Danusa. Là s'occupan Elisabeth Egli, ses um Hanspeter Beck e la figlia Sina Beck per circa 30 hectaras terren.
Sin il bain puril da IP-Swiss porschan els plazza per viver a 18 vatgas da latg e 19 chauras. La stad, cura ch'ils animals èn ad alp, utilisescha la famiglia da purs la stalla per tegnair intginas galdinas che vegnan lura commerzialisadas directamain l'atun.
Sin las medias socialas chatt'ins adina dapli uschenumnads «farmfluencers». Blers purs e puras raquintan en ils videos da lur mintgadi. Tscherts fan quai ord atgna iniziativa, intgins videos vegnan dentant era promovids da l'uniun purila. Uschia era ils videos da Sina Beck. La pura da 23 onns è vegnida dumandada da l'Uniun purila grischuna sch'ella haja gust da registrar 15 videos cun trais differents temas.
Uschia vesa ora in video da Sina Beck
Uschia datti in tal video
La pura ha elegì trais tematicas cun l'Uniun purila grischuna. Ils proxims mais vegn ella uss a registrar 15 videos davart ils temas: la prada natirala, la biodiversitad e l'engrasch da galdinas. Ella creescha in scenari grop per mintga video e filmescha lura ils differents pass da lavur cun ses telefonin. A la fin trametta ella il material da video a l'Uniun purila da Turitg che taglia in video or dal material.
L'Uniun purila da Turitg producescha gia dapi plirs onns tals videos. Sut il profil «Naturtalent» vegnan ils videos lura chargiads si. En sasez vuleva l'Uniun purila grischuna lantschar sezza in tal project. Cun la collavuraziun cun l'Uniun purila da Turitg nizzegian els uss dentant sinergias e profitan dal know-how da Turitg.
Sina Beck preschenta ses bain puril
Pertge ch'ins fa tals videos
Tenor l'uniun purila sa tracti da construir punts. Tranter la citad e regiuns plitost purilas, tranter consuments e producents e cunzunt tranter la glieud che ha pers la relaziun cun l'agricultura ed ils purs. Ils videos duain dar invista en il mintgadi sin in puresser svizzer e mussar transparent a l'ulteriura populaziun tge ch'in pur u ina pura fa.
L'emprim è quai schon stà ina sfida per Sina Beck. Suenter ils emprims videos èsi per ella dentant pli simpel da producir quels videos. Ils resuns sin ils emprims pèr videos èn stads online ed era da la famiglia e dad enconuschents per gronda part positivs.
